ဝက်သားတုတ်ထိုး၊ ကြာဆံကြော် ...

မဆွိတီတို့ ရန်ကုန်မှာ ဝက်သားတုတ်ထိုး စားရုံတင် အားမရလို့ အိမ်မှာလဲ လုပ်စားပါတယ်။ (ရောက်ရောက်ချင်း နောက်တစ်ပတ်ပါပဲ ... တိန် ... း)

ဝက်သားပြုတ်ခြင်း

Wet market က လတ်လတ်ဆတ်ဆတ် အူချို ၇၀၀ ဂရမ်၊ အသဲ ၃၀၀ ဂရမ်၊ အသား ၅၀၀ ဂရမ် ဝယ်ပါတယ်။ စလုံးက wet market တွေမှာ ကလီစာအစုံမရဘူးခင်ည။ နှလုံးတို့ ကျောက်ကပ်တို့တော့ မစားတတ်လို့ မဝယ်ခဲ့ဘူး။ (ဝက်ကလီစာဝယ်ရင် NTUC တို့ ရှန်စောင်းတို့က မဝယ်ပါနဲ့။ သူတို့က wet market ကလောက် မလတ်ဆတ်လို့ပါ။ )

အိမ်ရောက်တော့ အူချိုတွေကို မလှီးဖြတ်ပဲ မန်ကျည်းသီးမှည့်ရယ်၊ ဆားရယ် မျာများထည့်ပြီး ၃ကြိမ်လောက် သေချာနယ်ပြီး ဆေးလိုက်ပါတယ်။ (အူချိုက အထဲက အစာတွေမှို့ ရေနဲ့ အထဲကို ဆေးစရာမလိုပါဘူး)။ အသားနဲ့ အသဲကိုတော့ လှီးလို့ကောင်းအောင် အတုံးကြီးကြီးတုံးထားပါတယ်။

အထက်ပါ ကလီစာ ၁.၅ ကေဂျီခန့်ကို ဆားလဖ္ဘက်ရည် တစ်ဇွန်း၊ သကြားလဖ္ဘက်ရည် ၂ဇွန်း၊ ပဲငံပြာရည်အချိုရည် ၇ဇွန်း၊ အနောက်ရည် ၃ဇွန်းခန့်၊ ခရုဆီ ၇ဇွန်းခန့်၊ ငရုပ်ကောင်းမှုန့် ဇွန်းတစ်ဝက်ခန့်၊ တရုတ်မဆလာ နှစ်ဇွန်း၊ ဟင်းခတ်မှုန့်တို့နဲ့ နယ်ပြီး နာရီဝက်ခန့်နှပ်ထားပါတယ်။ အသဲကိုတော့ ဟင်းအိုးချခါနီးမှ ထည့်မှာမှို့ နယ်ပြီး သတ်သတ်ခွဲထားပါတယ်။

ပြီးရင် ကလီစာတွေကို အိုးထဲထည့် ဆီစားပွဲဇွန်း ၂ဇွန်း၊ နာနတ်ပွင့် ၅ပွင့်ခန့်၊ ထန်းလျှက်၂လုံး၊ ဂျင်းတစ်လက်မလောက်ကို ပါးပါးလှီးထည့်ပြီး မီးအနေတော်နဲ့ (medium) တယ်ပါတယ်။ ရေခန်းသွားရင် ကလီစာတွေ မြုပ်အောင်ရေထပ်ထည့်ပြီး မီးအေးအေးနဲ့ အဖုံးပိတ်ပြီး တည်ပါတယ်။ ကြက်ဥ ၃-၄လုံးလောက်ကိုလဲ ပြုတ်၊ အခွံနွှာပြီး အိုးထဲထည့်ပြုတ်ပါတယ်။

ဝက်အူချို ကျက်ချိန်နဲ့ ဝက်အသားနူးချိန်က အတူတူလောက်ပါပဲ။ ၄၅မိနစ်-၁နာရီလောက်ဆို ကျက်ပါပြီ။ ဝက်အူက အရမ်းပျော့သွားရင်လဲ မကောင်းပါဘူး။ ကိုယ့်စိတ်ကြိုက် အနေမှာ မြည်းပြီး ချနိူင်ပါတယ်။ ဟင်းအိုးချခါနီးမှ အသဲတွေကို ၅မိနစ်ခန့် ထည့်ပြုတ်ပါ။ အသဲက ကြာကြာပြုတ်ရင် မာတတ်လို့ပါ။ ဟင်းအိုးချရင် အရည်တစ်ဝက်လောက်နဲ့ ချပါ။ နောက်မှို့ဆို ဝက်သားတုတ်ထိုးက ခြောက်ခြောက်ကြီးနဲ့ စားမကောင်းလို့ပါ။ အဲဒီအရည်ကလဲ ကြာဆံကြော်နဲ့ ဆမ်းစားရင်ကောင်းမှကောင်းကိုး။

ကြာဆံကြော်ခြင်း

ကြာဆံကြော်လေးကလဲ ပူပူနွေးနွေး စားချင့်စဖွယ်လေးဖြစ်မှ ဝက်သားတုတ်ထိုးနဲ့ လိုက်ဖက်မှာပါ။ ရန်ကုန်မှာ စားခဲ့တုံးက ကြာဆံကြော်ဆို လာချပေးတာ အေးစက်နေတော့ စားရတာ အရသာပျက်လှတယ်။

ကြာဆံ အထုတ်ကြီး တစ်ထုတ်ခွဲလောက်ကို ရေစိမ်ပြီး ခပ်မာမာလေး ပြုတ်ထားပါတယ်။ အိမ်မှာတော့ Chilli brand ကြာဆံကို သုံးပါတယ်။

ကြာဆံအေးသွားရင် ဇလုံခပ်ကြီးကြီးထဲမှာ ကြာဆံကို ကပ်ကြေးနဲ့ အနည်းငယ်ညှပ်၊ ပဲငံပြာရည်အကြည်၊ အနောက်၊ ဆား၊သကြား၊ ဟင်းခတ်မှုန့်၊ ခရုဆီတို့နဲ့ နယ်ပါတယ်။ ကြာဆံတွေကပ်ပြီး လုံးနေရင် ရေအေး အနည်းငယ်ဖြန်းပြီး နယ်ပါ။


ဂေါ်ဖီထုတ် အစိမ်းရောင် အထုတ်ကြီး တစ်ဝက်လောက်ကို လေးထောင့်ပုံ ခပ်ကြီးကြီးတွေလှီးထားပါ။ မုန်ညင်းစိမ်း (အခါး) တစ်ပင်၊ တရုတ်နံနံ ၄-၅ပင်ကိုလည်း တစ်လက်မလောက်စီ လှီးဖြတ်ထားပါ။


ဝက်အူချောင်း၅ချောင်းလောက်ကို ခပ်ပါးပါး၊ အစောင်းလေးတွေ လှီးထားပါ။ ပထမဆုံး non sticker ဒယ်အိုးခပ်ကြီးကြီးထဲ ဝက်အူချောင်းကို ရေမြုတ်အောင်ထည့်ပြီး အရင်ပြုတ်ပါတယ်။ ရေခန်းတော့ ဆီ စားပွဲဇွန်း ၁၀ဇွန်းခန့်ထည့်ပြီး ကြော်ပါတယ်။

ဝက်အူချောင်းတွေ မွှေးပြီး ကျက်လာရင် ဂေါ်ဖီနဲ့ မုန်ညင်းလှီးထားတာတွေ ထည့်ကြော်ပါတယ်။ ကြော်နေတုံး ဆားလဖက်ရည်ဇွန်းတစ်ဝက်၊ သကြား၂ဇွန်း၊ ဟင်းခတ်မှုန့်၊ ပဲငံပြာရည် အနောက်ရည် တစ်ဇွန်း၊ အကြည်ရည် ၂ဇွန်းခန့် တို့ကိုလဲ ထည့်ပြီး မွှေပါတယ်။ တရုတ်နံနံကို နောက်ဆုံးမှ ထည့်ကြော်ပါတယ်။ အရွက်တွေအားလုံး ကျက်သွားရင် အဖတ်တွေကို သတ်သတ် ဆယ်ထားပါတယ်။ (ဆီနဲ့ဟင်းအရည်တွေ ဒယ်အိုးထဲမှာ ကျန်ပါမယ်)


စောနက အရွက်ကြော်က စစ်ထားတဲ့ ဆီနဲ့ရေ အရောကို ရေတွေခန်းသွားအောင်တည်လိုက်ပါ။ ဆီနဲရင်ထပ်ထည့်ပြီး ကြက်သွန်ဖြူ chop လုပ်ထားတာလေးတွေ ထည့်ကြော်တယ်။ ကြက်သွန်ဖြူမွှေးလာရင် ကြာဆံနယ်ထားတာ ထည့်ကြော်ပါတယ်။ ကြာဆံမကပ်အောင် ရေများများဖြန်းပြီး ကြော်ပေးရပါတယ်။ ဒါမှ ကြာဆံကြော်က စိုစိုလေးနဲ့ ပိုစားကောင်းပါတယ်။ ကြာဆံကို non-sticker အိုးနဲ့ကြော်ရင် အကပ်သက်သာပါတယ်။ ရိုးရိုးအိုးနဲ့ဆို ကပ်တာနဲ့ ကြော်ရတာ သိပ်ခက်ပါတယ်။ ၄-၅ မိနစ်ကြော်လို့ ကြာဆံကျက်ပြီဆို ခုနက ဆယ်ထားတဲ့ ဟင်းရွက်ကြော် အပေါ်ကလောင်းထည့်ပြီး ချနိူင်ပါပြီ။

အချည်ရည်ဖျော်ခြင်း

ကြက်သွန်ဖြူ၊ ဂျင်းကို ညက်ညက်ပါအောင်ထောင်း၊ မန်ကျည်းရေ၊ ငရုပ်ဆီ၊ ထန်းလျက်၊ ဆား၊ ငံပြာရည်၊ ဟင်းခတ်မှုန့်တို့ကို ရောကျိုပါတယ်။ ကျိုထားတာ ပွက်ပွက်ဆူလာရင် အပေါ့၊အငံမြည်း၊ လိုတာစိတ်ကြိုက်ထပ်ထည့် ချလို့ရပါပြီ။ အေးသွားရင် ငရုပ်သီးမှုန့် အကျက်မှုန့် အနည်းငယ်ထည့်ဖျော်ပါ။ ကြာဆံကြော်နဲ့စားမဲ့ အချဉ်ရည်ကို ခပ်ကျဲကျဲဖျော်ကြပါတယ်။ ငရုပ်ဆီကတော့ sin sin extra hot ကို သုံးပါတယ်။

ပွဲပြင်ခြင်း

ဝက်အူချောင်းကို တစ်လက်မခန့်စီ လှီးပြီးကြော်ထားပါ။

ဝက်သားတုတ်ထိုးက အသားတွေ၊ အသဲတွေကို ပါးပါးလှီး၊ အူချိုကိုလည်း တစ်လက်မအရွယ်လောက်စီလှီးပြီး ဟင်းရည်ထဲ ပြန်နှစ်ထားပါတယ်။ (ဟင်းရည်ထဲက နာနတ်ပွင့်တွေနဲ့ ဂျင်းတွေကို ဆယ်ပြီး လွှတ်ပစ်ပါ)။

ကြာဆံကြော်ကို ပန်းကန်ထဲထည့်၊ အပေါ်က ဝက်အူချောင်း၊ ဝက်သားတုတ်ထိုးလှီးထားတာထည့်၊ အချဉ်ရည်ရွှဲရွှဲဆမ်း၊ ဟင်းအရည်ဆမ်း၊ အစပ်ကြိုက်ရင် ငရုပ်သီး အကျက်မှုန့်ပါဖြူးပြီး စားနိူင်ပါပြီ။ ( ဂလု ... ကိုယ်တိုင်လည်း ပြန်ဖတ်ပြီး ဂလုပါတယ်ခည) ...

အားပေးကြပါဦး ... ပူပူနွေးနွေး ဝက်သားတုတ်ထိုး ကြာဆံကြော်။