ဆွိxုံ နှင့် စက်ဘီး ဇာတ်လမ်း

၄တန်း၅တန်းလောက်ဖြစ်လိမ့်မယ်။ ဆွိxုံ တို့ စက်ဘီးစီးချင်လွန်းလို့ အိမ်ကအကိုတွေကို သင်ခိုင်းရတာ။ သင်တဲ့ ဘီးကိုလဲကြည့်ဦးလေ။ အဖေတွေ၊အကိုတွေစီးတဲ့ ယောက်ျားစီး အကြီးကြီးကို အပေါ်ဘားတန်းမမှီလို့ ခွကြားထိုးသင်ရတာ။ စက်ဘီးကမှောက်လိုက်၊ လူကမှောက်လိုက်နဲ့ ဒူးခေါင်းမှာလဲ ဒဏ်ရာဒဏ်ချက်တွေကမနည်းဘူး။ သင်တဲ့အကိုတွေကလဲ စက်ဘီးစီးသာသင်တယ်။ ဘယ်လိုဘရိတ်အုပ်ရလဲဆိုတာ သင်မပေးဘူးဗျာ။ ဆွိxုံ တို့ကလဲ စက်ဘီးမှာ ဘရိတ်ပါတယ်ဆိုတာတောင်မသိဘူး။ အဲလောက်ထိ တော်တာ။

ကဲ ... အဲဒီတော့ ကုန်းဆင်းတို့ ဘာတို့ စက်ဘီးအရှိန်နဲ့ မောင်းလာရာကနေ ဘယ်လို ရပ်လဲမေးမလို့လား။ ရပါတယ်လေ။ ကုန်းဆင်းပြေပြေလေးတွေဆို စက်ဘီးက အရှိန်မသေပဲ ဆက်ပြေးနေရင် စက်ဘီးပေါ်ကအမြန်ခုန်ဆင်း၊ စက်ဘီးကြီးနဲ့ အတူ လိုက်ပြေးတာပေါ့။ စက်ဘီးအရှိန်သေလို့ရပ်မှ ကိုယ်လဲရပ်ပဲ။ ကုန်းဆင်းက သိပ်မတ်နေရင်တော့ စက်ဘီးပေါ်ကနေ ဆင်းတွန်းတာပေါ့၊ အပြေးကလေးပေါ့။ အဲလိုနဲ့ ဘရိတ်မအုပ်ပဲနဲ့ စီးနေတာပဲတစ်လလောက်တောင်ရှိပေါ့။

ဆွိxုံ တို့ နေတဲ့ အိမ်ကနေ ဈေးတို့ ဘာတို့ သွားချင်ရင် ကုန်းဆင်းမတ်မတ်လေးကိုကျော်မှ သွားရတယ်။ ကုန်းဆင်းက မတ်ရုံတင်မကဘူး ကုန်းဆင်းအဆုံးမှာ ဂငယ်ကွေ့ ရှိတယ်။ ဘေးမှာရေမြောင်းရှိတယ်။ ရေမြောင်းဆိုပေသိ အမဲရောင်ဗွက်တွေသာ မြင်နေရတာပါ။ စက်ဘီးစီးတိုင်း အဲနေရာရောက်ရင် တွန်းသွားနေကျ။

တစ်ရက်သား ဘီးလေးတွန်းသွားနေတုံး ဘေးကအကိုကြီးတစ်ယောက် စီးလာတာ အေးဆေးပဲ။ အသာလေး စီးပြီး ဂငယ်ကွေ့ကို ကွေ့ချလိုက်တာများ။ အို ... ဆွိxုံ တို့ ကြည့်ပြီး အံ့သြနေတာ။ ဒါနဲ့ သူတောင် ဂလို စီးလို့ရသေးတာ ငါဘာလို့မရ ရမှာလဲဆို။ နောက်တစ်ခေါက်သွားတော့ အဲဒီကုန်းဆင်း ဂငယ်ကွေ့ကြီးကို အလွတ် ဒီတိုင်းကြီး ဆင်းချလာတာ။ ဟမ်မာလေး ... ဘာပြောကောင်းမလဲ ... ဒုံးပျံခွစီးမိတဲ့အတိုင်း စက်ဘီးက အရှိန်မထိမ်းနိူင်ပဲ ဝရုန်းသုန်းကားနဲ့ လမ်းဘေးအကွေ့က ရေမြောင်းထဲ ထိုးကျပါလေရော။ လူလဲ သတိမေ့မတတ်ဖြစ်သွားတယ်။ ကျကျချင်း ဘာမှကို မသိတော့တာ။ သတိရတော့ ရေမြောင်းထဲမှာ။ လူလဲ တစ်ကိုယ်လုံး ဗွက်တွေပေ၊ မဲတူးပြီး စုတ်ပြတ်သတ်ပြီး အီစလံဝေနေပြီ။ ခြေထောက်မှာလဲ ဒါဏ်ရာတော်တော် ရလိုက်တယ်။

ဖြစ်ချင်တော့ မလှမ်းမကမ်းမှာ ရွယ်တူ ဆော့ဖော် ဆော့ဖက်တွေက ငုတ်တုတ်လေးတွေ ထိုင်ပြီး ဟင်းချက်တိုင်းလားမသိ ဆော့နေကြတာ။ အဲဒီထဲမှာ ဆွိxုံ နဲ့အစကထဲက မတည့်တဲ့ တစ်ယောက်ပါတယ်။ အဖြစ်က ဆွိxုံကို သူက အရိုးပဒေသာမလို့ အိမ်ရှေ့ကဖြတ်တိုင်း မကြားတကြား အော်အော်သွားတာကိုး။ ဒါကို အစကထဲက မကျေနပ်နေရတဲ့ကြားထဲ သူတို့က ဆွိxုံ အဖြစ်ကိုကြည့်ပြီး တဟားဟား ရယ်ကြပါလေရော။ ဆွိxုံတို့ ရှက်ကလဲရှက်။ နာကလဲနာနဲ့ ရှက်ရမ်းရမ်းပြီး အဲ့ထဲက မတည့်တဲ့သူကို ဘလိုင်းကြီး သွားရန်ထောင်လို့ ဘေးကတစ်ခြား သူငယ်ချင်းတွေ ဝိုင်းဆွဲလိုက်ရပါကော။ ဗွက်တွေနဲ့ မဲတူးပြီ ထော့ကျိုးဖြစ်နေတာတောင် ရန်က သွားထောင်နိူင်သေးတယ်။ ငယ်ငယ်က အဲလိုစွာကျယ်လန်ခဲ့တာ။

အဲလိုနဲ့ အရင်းအနှီး ကြီးကြီး ပေးဆပ်လိုက်ပြီးသကာလ။ ဆွိxုံ တို့ သဘောပေါက်လိုက်တယ်။

... စက်ဘီးတွေမှာ ဘရိတ်ပါတယ် ...

xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx