Steam Fish recipe - စင်္ကာပူစတိုင် ငါးပေါင်း

ဒီအပတ်တော့ ဟင်းတွေစားရတာ ပျင်းလာလို့ steam fish လေး စမ်းသပ်ကြည့်မယ်ဆို ငါး၂ကောင် ဝယ်လာခဲ့တယ်။ စင်္ကာပူမှာတုံးက Sea bass လို့ခေါ်တဲ့ မြန်မာလို ကက္ကတစ် ငါးပါ။ ဒီမှာတော့ barramundi ခေါ်ကြပါတယ်။ နာမည်တွေက အညိုးညိုးပဲနော့။

အဲဒီ Sea bass ၂ကောင်ဝယ်လာတာ တစ်ကေဂျီခွဲကျော်ကျော်ဆိုတော့ တစ်ကောင်ကို ၈၀၀ ဂရမ်လောက်ရှိပါတယ်။ ဒီနေ့ညနေတော့ တစ်ကောင်ပဲ စမ်းလုပ်ကြည့်ပါတယ်။

-------------------------------------------------------------------------------------

Steam fish လုပ်ဖို့အတွက် လိုတဲ့ ပစ္စည်းတွေကတော့

- Barramundi fish တစ်ကောင် (800 gm to 1 kg ခန့်)

- ကြက်သွန်မြိတ် (spring onion)အပင်ကြီးကြီး ၃ပင်ခန့် (နှစ်လက်မစီ အရင်ဖြတ်ပြီး အချောင်း သေးသေး စိတ်စိတ်လှီးထားပါ)

- နံနံ ၃ပင်ခန့် - တစ်လက်မခန့်စီ ဖြတ်ထားပါ။

- ဂျင်း (Ginger) တစ်လက်မခန့်  (အချောင်း သေးသေး စိတ်စိတ်လေးတွေ လှီးထားပါ။)

- ကြက်သွန်ဖြူ ၅မွှာခန့် (အချောင်း သေးသေး စိတ်စိတ်လေးတွေ လှီးထားပါ။)

- ငရုပ်သီး အနီ အတောင့်ရှည် ၂တောင့်ခန့်

Sauce အတွက်

- တရုတ်ဟင်းချက်ဝိုင် (Shaoxing rice wine) - စားပွဲဇွန်း ၃ဇွန်း

- ပဲငံပြာရည် အကြည်ရည် - စားပွဲဇွန်း ၃ဇွန်း ( အိမ်မှာတော့ Lee Kum Kee Premium light soy sauce  ကို သုံးပါတယ်)

- ပဲငံပြာရည် အနောက်ရည် - စားပွဲဇွန်း တစ်ဇွန်း (Lee Kum Kee Dark soy sauce)

- ငါးငံပြာရည် - စားပွဲဇွန်း တစ်ဇွန်း (squid brand premium fish sauce)

- သကြား - စားပွဲဇွန်း ၃ဇွန်း

- ရေ စားပွဲဇွန်း နှစ်ဇွန်းခန့်

ပထမဆုံး ငါးကို အကြေးခွံနွှာ ဗိုက်ဖောက်ပြီး သန့်ရှင်းရေးလုပ်ထားပါ။ (ဒီမှာတော့ ဆိုင်က တစ်ခါထဲ ကိုင်ပေးလိုက်တော့ ရေးတစ်ခေါက်ထပ်ဆေးပြီး ပြင်ရုံပါပဲ) ရေးဆေးသန့်ရှင်းပြီးတဲ့ငါးကို အပေါ်အောက်ကို ဆား (a pinch ) ခန့်နဲ့ အသာပုတ်ပေး၊ နယ်ပေးပါ။

ငါးဗိုက်ထဲကိုလည်း ဆား အနည်းငယ် ( a pinch ခန့်) နဲ့ ပုတ်ပေး၊ နယ်ပေးပါ။ နံနံ၊ ကြက်သွန်ဖြူ၊ ဂျင်း၊ ကြက်သွန်မြိတ် အချောင်းလေးတွေ (လှီးထားတာထဲက သုံးပုံ တစ်ပုံခန့်) ကိုလည်း ငါးဗိုက်ထဲ ထည့်လိုက်ပါ။

င်္ပြီးရင် ပန်းကန်အပြားထဲကို စောနက လှီးထားတဲ့ နံနံ၊ ကြက်သွန်ဖြူ၊ ဂျင်း၊ ကြက်သွန်မြိတ်၊ (နောက်ထပ် သုံးပုံ တစ်ပုံကို) နဲ့ ငရုပ်သီး အောက်က ခင်းပါ။ အပေါ်ကနေ ငါးကို တင်ပြီး steam လုပ်လို့ရပါပြီ။

ပန်းကန်ပြားဆန့်တဲ့ အိုးကြီးကြီးထဲ (သို့)  ဒယ်အိုးထဲကို ရေနွေးပွက်ပွက်ဆူကိုထည့်၊  ပြီးရင်အပေါ်က grill လုပ်တဲ့ ဇကာလေး တင်၊ အပေါ်ကမှ ငါးပန်းကန်လေးတင် အဖုံးလုံအောင် အုပ်ပြီး မိနစ် ၂၀ ခန့် ပေါင်းရပါတယ်။

အောက်က ပစ္စည်းလေးကတော့ ပန်းကန်ကို ထည့်၊ ပြန်ဆယ်ရင် သုံးရတာပါ။

၁၅မိနစ်ခန့်ပေါင်းလို့ ငါးကျက် သွားပြီဆိုရင် ငါးပန်းကန်ကို အပြင်ကိုထုတ်လိုက်ပါ။ အပေါ်ကနေ စောနက လှီးထားတဲ့  အမွှေးအကြိုင် spices (နောက်ဆုံး သုံးပုံ တစ်ပုံကို) ငါးအပေါ်ကနေ ဖြန့်ခင်းလိုက်ပါ။

ဒီမှာ အရေးကြီးတဲ့ step က ကျန်ခဲ့လို့ မရပါဘူး။ ဆီ စားပွဲဇွန်း ၃ဇွန်းခန့်ကို ကျက်နေအောင် အငွေ့တွေ ထွက်လာတဲ့ အထိ တည်လိုက်ပြီး ငါးပေါ်ကနေ နေရာနှံ့အောင် လောင်းချရပါမယ်။ ဒါမှ စောနက ပြင်ထားတဲ့ spice တွေကနေ အနံ့လေးတွေက မွှေးလာမှာပါ။

နောက်ဆုံးကျမှ စောနက ပြင်ထားတဲ့ sauce ကို အပေါ်ကနေ လောင်းထည့်လိုက်ရင် အနံ့၊ အရသာနဲ့ ပြည့်စုံတဲ့ steam fish လေးရပါပြီ။

ကိုက်လံလေးပါ ကြော်လိုက်တော့ ဒီနေ့ညစာ အတွက် ပြည့်စုံသွားပါပြီ။

အာလူး ပူရီ လုပ်စားရအောင် ...

အာလူးပူရီကို မြန်မာပြည်မှာ နေတုံးက ကောင်းကောင်း မစားဖူးပါဘူး။ ဆစ်ဒနီရောက်မှ  ဘုန်းကြီးကျောင်း ဈေးရောင်းပွဲမှာ ရောင်းတဲ့ ပူရီကို ကြိုက်ပြီး အိမ်မှာ လုပ်စားကြည့်တာပါ။

အာလူးပူရီ အတွက် လိုအပ်တဲ့ ပစ္စည်းတွေကတော့ (လူ ၃ - ၄ယောက် စာလောက်)

အာလူး ဟင်းအတွက်

အာလူး ၅၀၀ ဂရမ်

မုန်ညင်းစေ့ စားပွဲဇွန်း တစ်ဇွန်း

ဇီယာ စားပွဲဇွန်း တစ်ဇွန်း

သစ်ဂျပိုးခေါက်  ၂ ခုခန့်

ကလားဝေးရွက် ၃ရွက်ခန့်

ပျဉ်းတော်သိမ်ရွက် တစ်ခက် ကို ချွေထားပါ။

ဆီ စားပွဲဇွန်း ၅ ဇွန်းခန့်

ခရမ်းချဉ်သီး  ၃လုံးခန့် - နုတ်နုတ်စင်းထားပါ။

ကြက်သွန်နီ ၃လုံးခန့် - အခွံနွှာပြီး နုတ်နုတ်စင်းထားပါ။

ဂျင်း လက် တစ်ဆစ်ခန့် - ညက်အောင် ထောင်းထားပါ။

ကြက်သွန်ဖြူ - ၅မွှာခန့် - ညက်နေအောင် ထောင်းထားပါ။

ဆား

ဆနွင်းမှုန့် လဖက်ရည်ဇွန်း တစ်ဝက်ခန့်

ဟင်းခတ်မှုန့်

ပူရီအတွက်

ဂျုံ ၅၀၀ ဂရမ်ခန့်

ဆား အနည်းငယ်

သကြား စားပွဲဇွန်း ၂ဇွန်း

ဆီ စားပွဲဇွန်း တစ်ဇွန်း (နယ်ရန်)

ပူရီ ကြော်ရန် ဆီ များများ လိုပါတယ်။

အာလူးတွေကို နွှာပြီး တစ်လက်မ ပတ်လည်လောက် အတုံးလေးတွေ တုံး ဆား နယ်ထားပါ။

ဆီသတ်ဖို့ အတွက် အိုးဇောက်နက်နက် ထဲကို ဆီထည့် ဆနွင်းမှုန့်ထည့်၊ သစ်ဂျပိုးခေါက်တွေ ကုလားဝေးရွက်တွေအရင်ထည့် ဆီသတ်ပါ. ။ ပြီးရင် ကြက်သွန်နီ ထည့် ကြက်သွန်နွမ်းရင် မုံညင်းစေ့၊ ဇီယာနှင့် ပျဉ်းတော်သိမ်ရွက်တို့ကိုပါ ဆီသတ်ပါ။ ကြက်သွန် အရောင်နဲနဲ ညိုလာရင် ဂျင်းကြက်သွန်ဖြူတွေပါဆီသတ်ပြီး မွှေးလာရင်  ခရမ်းချဉ်သီး၊ အာလူးတို့ကို ပါ ရောပြီး ဆီသတ်ပါ။ ကပ်လာရင် ရေထည့်ပြီး အာလူးနူးအိသည်အထိ မီးအေးအေးနှင့်တည်ထားပါ။ ရေတော်တော်များများထည့်ရပါတယ်။ ကျက်ခါနီးရင် ဆား ဟင်းခတ်မှုန့်ထည့်ပြီး စိတ်ကြိုက်ပြင်ပါ။ ပူရီနဲ့ စားဖို့ မဆလာနံ့သင်းတဲ့ အာလူးဟင်းရပါပြီ။

ပူရီကြော်ရန်

ပူရီအတွက် ဂျုံနယ်ရန် ဂျုံကို ဆားသကြား ဆီတို့နဲ့ရောပြီး ရေနွေးနွေးကို ဖြေးဖြေးချင်း လောင်းထည့်ပြီး ၅မိနစ်ခန့်နယ်ပေးပါ။ ပြီးရင် ဂျုံလုံးကို အဝတ်ရေစွတ်ပြီး အုပ်ထားလိုက်ပါ။ ၁၀ မိနစ် ၁၅ မိနစ်ခန့်  ကြာရင် နောက်တစ်ခါ ၅ မိနစ်ခန့် ထပ်နယ်ပါ။ ပြီးရင် နောက်ထပ်ရေစိုဝတ်နဲ့ ၁၅ မိနစ်ခန့် ထပ်အုပ်ပြီးရင် ပူရီကြော်လို့ရပါပြီ။

ဂျုံနယ်ထားတာကို အလုံးလေးတွေ လုပ်ထားပြီး၊ ဂျုံလှိမ့်တဲ့ ဒလိမ့်တုံးနဲ့ ပါးနေအောင် လှိမ့်ပါ။ ဆီများများထည့်ထားတဲ့ အိုးထဲ ထည့်ကြော်ပါ။ မုန့် က ပွလာရင် နောက်တစ်ဖက်လှန်ပါ။ ၂ဖက်လုံး ဖောင်းလာရင် ဆီထဲကနေ ကော်ပါ

အချဉ် အတွက်

ကြက်သွန်နီ ပါးပါးလှီး ခရမ်းချဉ်သီးနဲ့ ပူစီနာ ကိုလည်း ပါးပါးလှီး ပြီး ဆား လေး၊ သံပုရာရည်လေး ညှစ်ပြီး နယ်ထားပါ။

အသားမပါရင် မစားတတ်တဲ့ ဦးခြိမ့်အတွက် ကြက်သား မဆလာ ဟိဒြူစတိုင် 

Chicken Pie လုပ်စားကြရအောင် ..

ဒီမှာ Chicken pie ဆိုတာ မသိရင်တော့ အင်မတန်ပေါ ဘယ်နေရာမဆို ဝယ်ရတယ်ထင်နေကြမှာ ။ တကယ်တမ်းကျတော့ ကောင်းကောင်းစားချင်ပြီဆို ဘယ်မှာ ဝယ်စားရမှန်း မသိပါဘူး။ သိတဲ့ဆိုင်ကျတော့လဲ အိမ်ကနေ နာရီဝက်လောက်မောင်းမှ ရောက်တော့ pie လေးအတွက်နဲ့တော့ အဲလောက် အဝေးကြီးကားမမောင်းချင်တာနဲ့ အိမ်မှာပဲ လုပ်စားဖြစ်တော့တယ်။ Recipe ကတော့ ဂျူဂျူလေး ကျောင်းမှာ food technology သင်ရတော့ သူ့ဆီကရတာပါ။

 Chicken pie ၈ခု စာ အတွက် ပြင်ထားရမှာတွေက (လူ ၄ယောက်စာလောက်ရှိပါတယ်)

အထဲက ဌာပနာအတွက်

ကြက်သားရင်ပုံသား - ၃၅၀ gm - 1cm ပတ်လည် အတုံးလေးတွေ တုံးပြီး ဆားငရုပ်ကောင်းနဲ့နယ်ထားပါ။

ကြက်သွန်နီ ၂လုံး-  1cm ပတ်လည်လောက် chop လုပ်ထားပါ။

ကြက်သွန်ဖြူ ၅မွှာလောက် - နုတ်နုတ်စင်းထားပါ။

ပြောင်းဖူးချွေပြီးသား - 3/4 cup

ပဲစိမ်းလုံး (green pea) - 3/4 cup

Butter -  ၄၀ ဂရမ်

chicken stock - 1cup

ငရုပ်ကောင်း အကြမ်းမှုန့် - လ္ဖက်ရည်ဇွန်း တစ်ဝက်

ဟင်းခပ်ဆီ စားပွဲဇွန်း တစ်ဇွန်း

ဂျုံမှုန့် -  1/2 cup

ကြက်ဥ တစ်လုံး

မုန့်ပြင်ဖို့အတွက်

Pastry - 25 cm square  ၄ ချပ်

တစ်ခါသုံး aluminium pie cup -  ၈ ခွက်

(ကိုယ့်အိမ်မှာရှိတဲ့ အပူခံ ဒန်ခွက်၊ ကြွေခွက်၊စတီးခွက် ကြိုက်ရာနဲ့ လုပ်နိူင်ပါတယ်။ pastry ကို ခွက်နဲ့ ကိုက်အောင် ဖြတ်ဖို့ပဲ လိုတာပါ။ ဒီတစ်ခါသုံးလေးတွေက ၄ခု ကွက်တိ ဖြတ်လို့ရလို့ သဘောကျနေတာ)

ပထမဆုံး oven ကို preheat 180 deg C ထားပါ။

စောနက နယ်ထားတဲ့  ကြက်သားကို အိုးထဲကို ဆီထည့် မီးအနေတော်နဲ့ (၃-၄ မိနစ်လောက်) အပူပေး၊   ကြက်သား အနည်းငယ် ကျက်သွားရင် သပ်သပ် ကော်ထားပါ။

စောနက ကြက်သားအိုးနဲ့ပဲ ထောပတ်ထည့် ၊ ကြက်သွန်ဖြူ၊ နီတွေထည့်ကြော်ပါ။ ကြက်သွန်တွေ နဲနဲညှိုးလာတာနဲ့ ပြောင်းဖူး၊ ပဲစိမ်းလုံးလေးတွေထည့်၊  ကြက်သားကိုလဲ ထည့်ပြီး မွှေပေးပါ။ ပြီးရင် chicken stock ကို 1 cup လောက်ထည့် ပွက်လာရင်၊ ဂျုံမှုန့် ထည့်ပြီး မွှေပေးပါ။ အနှစ်လေး ဌာပနာလို့ ကောင်းရုံအနေအထား ပျစ်လာပြီဆို ချပြီးအအေးခံထားပါ။ အပေါ့အငံ ဆားငရုပ်ကောင်း ကိုယ်ကြိုက်သလို သင့်တော်အောင် ပြင်ပါ။

 Pastry အတွက် အောက်က ပုံအတိုင်း အောက်ခံ ၈ ခု၊ အပေါ်က အဖုံး ၈ ခု ကို ဖြတ်ထားပါ။ တစ်ချပ်ကို အဝိုင်းပုံ ၄ခု ရပါမယ်။ စုစုပေါင်း pastry အဝိုင်း ၁၆ ခု ရရပါမယ်။  အပေါ်က အမိုးလုပ်မဲ့ အဝိုင်းလေးတွေကိုတော့ အလည်ကနေ ဓားလေးနဲ့ cross ပုံလေး ဖောက်ထားပေးပါ။

ပြီးရင် တစ်ခါသုံး pie ခွက်လေးတွေထဲကို pastry အဝိုင်းကိုခင်းပြီး၊  အောက်က သူ့ခွက်ပုံလေးအတိုင်း ဖြစ်အောင် အပေါ်နှုတ်ခမ်းနားအထိ  ဖြန့်လိုက်ပါ။ ခွက်ထဲမှာ အခင်းခင်းတာပေါ့။  ၈ခွက်လုံး တစ်ပြိုက်တည်း ပြင်ထားပါ။

အဲဒီခွက်ကလေးတွေထဲကို စောနက ဌာပနာလေးတွေကို အပြည့် လောင်းထည့်ပါ။

 အပေါ်ကနေ အဖုံးလေးတွေ ဖုံးပြီး ဘေးလေးတွေကို အပေါ်နဲ့ အောက် (အမိုးနဲ့ အကာ) ကပ်သွားအောင် ခက်ရင်းလေးနဲ့ ဖိပြီးလိုက်ပိတ်ပေးပါ။

အပေါ်က အရောင်လေး လှအောင် ကြက်ဥ ခေါက်ထားတာလေး သုပ်ပေးပါ။

စောနက preheat လုပ်ထားတဲ့ oven ထဲကို 180 deg နဲ့  ၁၂ မိနစ်လောက် ထားလိုက်ရင် အနံ့ အရသာနဲ့ ပြည့်စုံတဲ့ Chicken pie လေးတွေ ရပါပြီ။ ပူပူနွေးနွေး fresh ကိုစားရင် အရသာ ပိုကောင်းပါတယ်။