အော ... ရှင်တို့က ..

တီတီဆွိသည် စိတ် အလွန်မြန်၏။ ထို့ကြောင့် ကားကို အမြန်မောင်းရာ တစ်နေ့တွင် ရဲ အလိုက် ခံရလေသည်။ ၅၀ လမ်းကို ၇၉နှင့် မောင်း၍ဖြစ်သည်။ ထိုနေ့က အိပ်ထဲမှ ဖွတ်ကလိ ဒင်္ဂါးအတော်များများ ခုန်ဆင်းသွားကြသည်။ Demerit ပွိုင့်များလဲ ဖြတ်ခံလိုက်ရသည်။ ကိုရွှေရဲက ၇၉ထက် တစ်ကီလိုမီတာ ပိုပါက လိုင်စင်ပါ အသိမ်းခံရမည်ဟု ပြောသွားသေးသည်။

ထိုမှ စ ကာ ရဲမြင်တိုင်း မျက်ရည်ဝိုင်းနေသော တီတီဆွိသည် ကားမောင်းလျှင် သတ်မှတ်မိုင်နှုံးနှင့်သာ မောင်းတော့သည်။ အိမ်ကလူကိုလဲ သတ်မှတ်မိုင်နှုံးထက် ပိုမမောင်းရန်၊ လမ်းစည်းကမ်း လိုက်နာရန် အားတိုင်း briefing ပေးတော့သည်။ သတ်မှတ်မိုင်နှုံးအတိုင်းမောင်းရင် ကိုယ့်ဖက်က အမြဲ safe ဖြစ်တယ်။ ဘယ်လောက်မှလဲ နောက်ကျတာ မဟုတ်၊ ဘယ်ကင်မရာမှလဲ ကြည့်စရာမလို၊ ဘာရဲမှလဲ ဂရုစိုက်စရာ မလို ဟု ကားမောင်းတိုင်း ဘေးမှ တတွတ်တွတ် ရွတ်လေသည်။ ဂရုစိုက်စရာ မလိုဟုသာပြောသည်။ ရဲတွေ့တိုင်း " ဟိုမှာ ရဲ ... ရဲ ... " " police ... police .. " ဆိုကာ ကြောင်တွေ့သည့် ကြွက်လို ကြောက်နေသူက သူမပင်ဖြစ်သည်။ 

မနေ့ က ခလေး ကျောင်းပို့ အပြန် အိမ်ကလူ ကားမောင်းသည်။ သူ့ရှေ့တွင် ရဲကားတစ်စီး ကပ်လျက် လှမ်းမြင်လိုက်ရာ ရှေ့မှာ ရဲနော် .. ၆၀ ... ၆၀ ဟု သတိပေးလိုက်သည်။ အိမ်ကလူက သိပါတယ်ကွာ ... ၆၀နဲ့ပဲ မောင်းနေတာပါဟု ပြောသည်။ ကြည့်နေရင်းနှင့် ရှေ့မှ ရဲကားသည်အဝေးကြီး ရောက်သွားရာ မြင်လား ... သူကတောင် မိုင် ပို မောင်းနေတာ ... ဆိုမှ အွန်လိုင်းမှာ သူငယ်ချင်းတွေ နောက်ပြောင် ပြောနေကျ စကားကို သတိရသွားကာ ပြုံးမိလေသည်။

ဒီတစ်ခါပဲ ဒီစကားကို နေရာမှန် လူမှန် သုံးဖူးသည်။

" အော ... ရှင်တို့က ရဲတွေကိုး ..... လုပ်ကြပေါ့ ...."