ကြက်ကာလသမီးချက်

ဒီဟင်းကို လွန်ခဲ့တဲ့ ၇နှစ်၊ ၈နှစ်လောက် မြန်မာပြည်ပြန်တုံးက နာမည်ကြီး မြန်မာထမင်းဆိုင်တစ်ဆိုင်မှာ စားဘူးတာပါ။ သူချက်ထားတဲ့ ကြက်သား ကာလသမီးချက်လေးက စပါးလင်နံ့လေးမွှေးပြီး စားကောင်းလွန်းလို့ အမှတ်တရပါပဲ။ ကြက်သား ကာလသားချက်ကိုပဲ နာမည်လေးထူးအောင်ပေးပြီး ဟင်းချက်နည်းလေး နဲနဲဆန်းထားတာပါ။ စားပြီးတော့ ဟင်းချက်နည်း စာအုပ်လေးပါ လာရောင်းလို့ ဝယ်ထားလိုက်ပါတယ်။ နန်းစန်းစန်းအေးရဲ့ အဓိပတိ ဟင်းချက်နည်း နှင့် ဟင်းအတွဲအစပ်များ စာအုပ်လေးပါပဲ။

စင်္ကာပူပြန်ရောက်တော့ စာအုပ်ထဲမှာပါတဲ့ ကြက်သားကာလသမီးချက်ကို သူပြောတဲ့ အတိုင်းချက်ကြည့်ပြီး အလွန်ကြိုက်လို့ အိမ်မှာ မကြာခဏချက်စားတဲ့ ဟင်းတစ်ခွက် ဖြစ်ခဲ့ပါတယ်။ ခုတော့ အိမ် ၇အိမ်လောက် ပြောင်းအပြီးမှာ စာအုပ်လဲပျောက်၊ ဟင်းချက်နည်းကလဲ နဲနဲတော့ ကွဲလွဲနေမလား မသိနိူင်တော့ဘူး။ ပြီးခဲ့တဲ့ အပတ်က ချက်ထားတဲ့ ဟင်းလေးကတော့ စားလို့ကောင်းဆဲပါ။ ဓာတ်ပုံလေးတွေ ရိုက်ထားလို့ ရှယ်ပေးလိုက်ပါတယ်။ ဆန်းဆန်းပြားပြားဟင်းတစ်ခွက် မဟုတ်ပေမဲ့ ချက်ရလွယ် စားလို့လဲ ကောင်းပါတယ်။ အရင်က ကိုယ်ချက်ဘူးတဲ့ ကာလသားချက်ထက် အများကြီး အရသာရှိပါတယ်။ အဲဒီတုံးက စပါးလင်နဲ့ ငါးငံပြာရည်မထည့်ပါ။

ကြက်သားကို ခုတ်ထစ်ပြီး ငါး(သို့) ပုဇွန်ငံပြာရည်၊နနွင်းအနည်းငယ်၊သကြားအနည်းငယ်၊ ငရုပ်ကောင်းမှုန့်၊ ငရုပ်သီးအရောင်တင်မှုန့်၊ ခရမ်းချဉ်သီး ၂လုံးခန့် လှီးထားတာရယ်၊စပါးလင်၊ ကြက်သွန်ဖြူ၊-နီ၊ထောင်းထားတာနဲ့ နယ်ပြီး ၁၅မိနစ်ခန့် နှပ်ထားပါ။ နယ်တဲ့အခါ အသားထဲ ဆားပျားရောက်အောင် လက်နဲ့ နာနာဖိ၊ ဆုတ်နယ်ပေးဖို့တော့ လိုပါတယ်။

ကြက်သားအပြင် ကြက်ခြေထောက်ရိုးလို တောင်ပံမျိုးလို လည်ပင်ရိုးလို အရိုးများများနဲ့ ချက်ရင်တော့ ဟင်းက ပိုချိုမှာ အသေအချာပါပဲ။

ငရုပ်သီးခြောက် အတောင့်လိုက် ၃-၄တောင့်လောက်ထည့်ပြီး မီးအနေတော်နဲ့ တည်ပါ။

တည်နေရင်း ဆီသံဖျစ်ဖျစ် မြည်ရင် အသာမွှေပေးပါ။ ကပ်ခါနီးပြီဆို ငရုပ်ဆုံဆေးရေလေးထည့်

ကြက်သားကျက်လောက်အောင် မီးအေးအေးနဲ့ အဖုံးပိတ်ပြီးတည်ထားပါ။ စလုံးက ကြက်သားကတော့နုတော့ ၁၅မိနစ်လောက်ဆို ရပါပြီ။ ကြက်သားနူးပြီဆို ဗူးသီး အတုံးကြီးကြီး တုံးထားတာကိုထည့်၊ ရေမြုတ်အောင်ထည့်ပြီး မီးအေးအေးနဲ့ ထပ်တည်ပါ။ ဗူးသီးလဲနူး ကြက်သားထဲက အချိုရည်လဲ ဗူးသီးထဲ စိမ့်ဝင်ပြီဆို ရေစပ်စပ်လေးနဲ့ စပါးလင်နံ့သင်းတဲ့ ဗူးသီးကာလသမီးချက်ရပါပြီ။ ပိုမွှေးအောင်ချခါနီး ငရုပ်ကောင်းလေးထပ်ထည့်ပါ။ဆားပေါ့ရင်တော့ ငါးငံပြာရည်လေးခပ်ပါ။ အိမ်မှာတော့ အဲဒီဟင်းချက်ရင် ဟင်းအစပ်အနေနဲ့ သခွါးသီးကိုခြစ်၊ သံပုရာသီး၊ မြေပဲဆံထောင်းနိူင်နိူင်နဲ့ သုတ်တာမျိုး၊ ခရမ်းချဉ်သီးသုတ် လိုဟာမျိုးနဲ့ စားလေ့ရှိပါတယ်။

ခူးခပ်ပြီး စားဖို့ရာ အဆင်သင့်။ ပဲတီချဉ်သုတ်လေးနဲ့။

ပဲတီချဉ် ပြုလုပ်နည်း

ဆန်ဆေးရေ မိုင်လို ပုလင်းလောက်အရွယ် ပုလင်းထဲထည့် ၊ ဆား လက်ဖက်ရည်ဇွန်း တစ်ဇွန်းထည့် ၊ ထမင်း စားပွဲဇွန်းတစ်ဇွန်း ချေထည့် (မခဲနေရဘူးလို့ ဆိုလ်ိုတာပါ) ပြီးရင် ပဲတီချဉ်ကို လုံးဝ၊ လုံး၀ ရေမဆေးပဲ ဈေးကဝယ်လာတဲ့ အတိုင်းထည့်၊ ပုလင်းအဖုံးလုံအောင်ပိတ်၊ ၃ရက်တိတိ အဖုံးမဖွင့်ပဲ ထားပါတဲ့။ အပေါ်မှာ ပုလင်းအရွယ်လေး မှန်းရလွယ်အောင် ပုံလေး တင်ပေးထားပါတယ်။ ချဉ်ရင်လဲ ပြောကြပါဦးနော်။