Chinese Wok

ဟိုနေ့က ဆတ်ဆော့ပြီး Chinese wok တစ်လုံးဝယ်လာတယ်။ တရုတ်ဆိုင်မှာ ကြာဆံကြော်တို့ ထမင်းကြော်တို့ ကြော်ရင် သံဇွန်းကြီးနဲ့ တဂွက်ဂွက်ခေါက်ပြီး မီးတွေတောက်အောင် ကြော်တဲ့ သံဒယ်အိုးပေါ့ဗျာ။

အိမ်မှာလဲ စင်္ကာပူက အစာတွေ ငတ်တိုင်း၊ ဗမာပြည်က ဟင်းတွေ ငတ်တိုင်း ကြော်စား၊ ချက်စားနေကျဆိုတော့ တရုတ်ဆိုင်တွေလို ဒယ်အိုးကပ်နံ့ သင်းသင်းလေးနဲ့ ကြာဆံကြော်တို့၊ ထမင်းကြော်တို့ ကြော်စားချင်တာ။ လက်တည့် စမ်းချင်တာ အဓိကပေါ့။

ဒါနဲ့ အဲလိုဒယ်အိုးတွေက စစချင်း ဆီ၀ပြီးကြော်လို့ကောင်းအောင် seasoning ဆိုတာလုပ်ရတယ်ဆိုတာ ကြားဖူးတော့ ဂူဂဲထဲရှာဖတ်ပြီး သူတို့ပြောသလို ဒယ်အိုး ဆပ်ပြာရည်နဲ့ဆေး၊ အဝတ်နဲ့သုတ်၊ ဆီသုတ်ပြီး မီးပြင်းပြင်းနဲ့ တည်ဆို လုပ်နေတုံးရှိသေး ဦးခြိမ့်က ဒယ်အိုးနဲ့ ပါလာတဲ့ အညွှန်းကို ပြပါလေရော။ အဲဒီကျ ကြည့်လိုက်တော့ သူက ပိုလို့တောင် ရှုပ်သေး။ Repeat လုပ်ရတဲ့ အဆင့် ပါ ထည့်တွက်ရင် အဆင့် က ၁၇ဆင့်လောက်ဖြစ်နေပြီ။ အပေါ်က ဆားနဲ့ လုပ်တဲ့ အဆင့်တွေက ပြန်လုပ်လို့ မရတော့ အဲဒါတွေ ကျော်ပြီး ဆီသုတ်ပြီး ၁၀မိနစ်စီ မီးပြင်းတိုက်တဲ့ အဆင့်ပဲ ဆက်လုပ်ရတော့တယ်။

အိမ်ထဲ မီးခိုးတွေ ရိုက်မှာစိုးလို့ အပြင်က barbecue burner မှာ သွားပြီး ဆီသုတ်လိုက် ကင်လိုက် ဒယ်အိုးအပူကြီးက အမဲအမှုန်တွေ သုတ်လိုက်နဲ့ ၃ခါလောက်ဆိုတော့ လူတွေလဲ တော်တော်မောနေပြီ။ ဟမ်မလေး ဒယ်အိုးလေး သုံးရပါမဲ့ အရေး ဒီလောက် အပင်ပမ်းခံရလား ဆို ငြီးတွားနေကြပြီ။

အားလုံး အဆင့်တွေပြီးတော့ လူက မနေနိူင် စမ်းသပ်ကြည့်ချင်တာနဲ့ မနက်စာ ထမင်လေး ထကြော်တယ်။ ဆိုးတော့ မဆိုးဘူးပေါ့။ non sticker လိုပဲ မကပ်ဘူးပေါ့။ ပြီးတော့ တရုတ်တွေ ကြော်တဲ့ ဇွန်းကြီး တဂွက်ဂွက်နဲ့ မာန်ပါပါနဲ့ ကြော်နေတာ။ ထမင်းကြော်လေး မွှစိနှောက်ကို။ မဆိုးပါဘူး။ ပုံမှန်ကြော်တာထက် တရုတ်ဆိုင်ကြော်နဲ့ တော်တော်တူတယ်ဆို တွေးပြီးကျေနပ်နေတာ။

ထမင်းကြော်စားပြီးသကာလ ... မည်သို့မည်ပုံ ဆေးကြောရမည်လဲဆိုတာ မသိလို့ အညွှန်း ပြေးဖတ်ကာမှ ဒေါ်ဆွိတီတစ်ယောက် ပုံလဲကျမတတ် ဖြစ်သွားရတယ်။

ဒယ်အိုးကို ဆပ်ပြာရည်နဲ့ အသာဆေးပြီး အပေါ်က လုပ်ခဲ့ တဲ့ (မီးကင်တဲ့) အဆင့် ၃ဆင့်ကို repeat ပြန်လုပ်ပြီးမှ သိမ်းပါတဲ့ခင်ဗျား။

ဂစ် ... ဂစ် ...