အာလူး ကတ်တလိတ်ကြော်

ဂျူဂျူစားချင်တယ်ဆိုလို့ အာလူးကတ်တလိတ် ကြော်ပေးရတယ်။ ငယ်ငယ်က ခဏခဏ ကြော်ပေးတာ သိပ်စိတ်မဝင်စားပဲ MKR ရှိုးမှာ ပြတာနဲ့ ခုစားချင်တယ်ဆို ထ ကြော်ပေးရတာ သူအရမ်းကြိုက်တယ်တဲ့။

မှတ်မိတုံးလေး ကြော်နည်းလေး အကြမ်းဖျင်းရေးလိုက်ဦးမယ်။

အာလူးကို အိလာအောင်ပြုတ်ပြီး အခွံခွါ ထောင်းပါ။ ထောင်းတဲ့အခါ ဆား၊ ငရုပ်ကောင်းမှုန့်၊ ဟင်းခတ်မှုန့်နဲ့ ထောပတ်နဲနဲပါထည့်ထောင်းပြီး ကိုယ်ကြိုက်တဲ့ အနေအထား အပေါ့ အငံရအောင် မြည်းကြည့်ပါ။

အထဲအစာသွပ်ဖို့အတွက်ကတော့ ဝက်သားအကြေလေးတွေကို ကြက်သွန်ဖြူထောင်းထားတာနဲ့ ကြက်သွန်နီလေးတွေ chop လုပ်ထားတာနဲ့ ဆား၊ ငရုပ်ကောင်း၊ ပဲငံပြာရည် အနည်းငယ်နဲ့ ရောကြော်ထားပါ။

ကြက်ဥတစ်လုံးကို ခေါက်ထားပါ။

Bread crumb ကို ပန်းကန်ပြားတစ်ချပ်မှာ ထည့်ထားပါ။ Bread crumb က flavor ပါတဲ့ အမျိုးဆို ပိုကောင်းပါတယ်။

ပြီးတော့ အာလူးထောင်းထားတာကို အလုံးလေးတွေလုံး အထဲမှာ ဝက်သားအကြေကြော်ထားတာကို ဌာပနာပြီး ပြန်ပ်ိတ်အလုံးတွေပြန်လုံးပြီး ကြက်ဥခေါက်ထားတဲ့အထဲ ကြက်ဥတွေ ရွှဲနေအာင်နှစ်ရပါတယ်။ ဒါမှ ကြော်တဲ့အခါ ဌာပနာတွေ ပေါက်မထွက်မှာပါ။ ပြီးတော့ bread crumb ထဲ ထည့်လိမ်းပြီး ဆီပူပူထဲ ထည့်ကြော်ပါ။ တစ်ခြမ်း အညိုရောင်သန်းလာရင် နောက်တစ်ဖက်ကို လှန်ပေးပါ။ အရသာ ရှိတဲ့ အာလူးကတ်တလိတ်ကြော်ရပါပြီ။ သူ့ချည်းပဲစားစား ထမင်းနဲ့ပဲစားစား စားလို့အရသာသိပ်ရှိပါတယ်။ မဆလာတွေ အစပ်တွေ မပါတဲ့ ခလေးတွေကြိုက်မဲ့ ဗားရှင်းပါ။