ဝက်သုံးထပ်သား ပဲငပိ ကြော် (Stir fried pork belly with bean sauce)

ဒီနေ့ ညစာ

ဝက်သုံးထပ်သား ပဲငပိ ကြော်

Stir fried pork belly with bean sauce

စားကောင်းလွန်းလို့ ‌ဘော်ဒါတွေလဲ ချက်စားရအောင် ချက်နည်းလေး ရှယ်ပေးလိုက်မယ်။

ဝက်သုံးထပ်သား ၅၀၀ ဂရမ်လောက်ကို 3mm လောက် အထူလေးတွေ လှီးပြီး ပဲငံပြာရည် အကြည်ရေ လက်ဖက်ရည်ဇွန်း တစ်ဇွန်း၊ ဟင်းခပ်မှုန့် အနည်းငယ်၊ တရုတ်ဟင်းချက်ဝိုင် 2 table spoon နဲ့ အရင်နယ်ပြီး နာရီဝက်ခန့် အနည်းဆုံးနှပ်ထားပါ။

..

အသီးအရွက်တွေ ထည့်ကြော်ဖို့

ကြက်သွန်နီ ၂လုံးခန့် ၄စိတ်စိတ်

ကြက်သွန်ဖူးလေးတွေ လှီးထား

ငရုပ်ပွအချို အနည်းငယ်လှီးထား

..

ဟင်းခပ်အမွှေး အကြိုင်အတွက်

ဂျင်း များများကို ခပ်ပါးပါးလှီးထား

ကြက်သွန်ဖြူများများနဲ့ ငရုပ်သီးစိမ်း၄တောင့်လောက်််ကို နုတ်နုတ်စင်းထား

ငရုပ်ကောင်း အနက် မညက်တညက် 1/2 tea spoon

ဇီချွမ် ငရုပ်ကောင်း ထောင်းထားတာ အနည်းငယ် (1/4 tea spoon)

ကြက်သွန်မြိတ် ၃ချောင်းလောက် အပိုင်းကြီးကြီးဖြတ်ထား

..

အရသာနဲ့ အရောင်လှအောင်

ပဲငပိ 3 table spoon

သကြား 1.5 table spoon

ဟင်းခပ်မှုန့် အနည်းငယ်

အရောင်တင်မှုန့် 1 tea spoon

..

Wok လို ဒယ်အိုးထဲကို မီးပြင်းပြင်း နဲ့ ဆီများများထည့် ဝက်သားလှီးထားတာတွေ အရင်ထည့် ကြော်။

ဝက်သားက အရည်တွေ ခမ်းပြီး ဆီတွေပဲ ကျန်ရင် ဇီချွမ်၊ ဂျင်း၊ကြက်သွန်ဖြူ ကြက်သွန်မြိတ် အရင်းပိုင်း အစရှိသည် ဟင်းခတ် အမွှေးအကြိုင်တွေ ထည့် ကြော်ပါ။

အတန်ငယ်ကြာလို့ အနံ့မွှေးလာရင် အရောင်တင်မှုန့် ထည့်ပါ။ အနည်းငယ်မွှေပြီး

အသီးအရွက်တွေ ထည့်‌ကြော်ပါ။ (ကြက်သွန်ဖူးက မာလို့ အရင်ထည့်ကြော် ပြီးမှ ကြက်သွန်နီနဲ့ ငရုပ်ပွထည့်ပါ)။ အရသာအတွက် ပဲငပိနဲ့ သကြား ထည့်ပြီး မွှေပေးပါ၊ ချခါနီး မှ ကြက်သွန်မြိတ်လေး ထည့်‌ကြော် အလွန်စားကောင်းပြီး အနံ့ အရသာနှင့် ပြည့်စုံသော ဝက်သုံးထပ်သား ပဲငပိကြော် ရပါပြီ။

ထမင်းဖြူလေးနဲ့ ရေနွေးကြမ်းနဲ့ တခြားဘာဟင်းမှ ထပ်မလိုပဲ စားလို့ကောင်းလို့ အိမ်မှာ ခုတလော အဲလို တရုတ် stir fry တွေ စားဖြစ်နေတယ်၊ ဦးခြိမ့်ကလဲ ကြိုက် တယ်တော်။

..

Tips- တရုတ်စာကြော်ရင် wok လို ဒယ်အိုးထဲမှာ မီးပြင်းပြင်း ဆီများများနဲ့ ဆီ မီးခိုးထွက်အောင် ကြော်မှ အနံအလွန်မွှေးပြီး စားကောင်းပါတယ်။