ကြက်ကချင်ချက် ချက်နည်း ကို ရေးပြီးသားမှတ်လို့ facebook မှာ memory ပေါ်လာတော့ ဒီဘလော့ဂ်ထဲ လိုက်ရှာမိတယ်၊ ရှာမတွေ့မှ မရေးရသေးဖူးပဲဆို ဒီထဲမှာ လာမှတ်သားပါတယ်၊
ကြက်ကချင်ချက် ချက်ဖို့ရာ အိမ်မှာ ပင်စိမ်းတွေကလဲ တော်တော်ရင့်နေတော့ အတော်ပဲ၊ မျှစ်ကလဲ တစ်ဗူး အိမ်မှာ အဆင်သင့်၊ ကြက်ပေါင်တွေကလဲ တစ်ကေဂျီ ဝယ်ထားတော့ ချက်ရုံပဲ။
လူ ၃-၄ ယောက်စာခန့် ကြက်ကချင်ချက် အတွက်လိုအပ်တဲ့ပစ္စည်းတွေကတော့
ကြက်တစ်ခြမ်း (သို့) ကြက်ပေါင် တစ်ကေဂျီ
မျှစ် တစ်ဗူး (၄၀၀ ဂရမ်ခန့်)
ပင်စိမ်းရွက် လက်တွင်း တစ်ဆုတ်
နံနံ ပင် တစ်စီး
ငရုပ်သီးစိမ်း ၅ တောင့်ခန့်
ငရုပ်သီးခြောက်အပွ ၈ တောင့်ခန့်
ကြက်သွန်ဖြူ ၈ မွှာ
ဂျင်း လက်တစ်ဆစ်ခန့်
ဆီ စားပွဲဇွန်း ၆ ဇွန်းခန့်
ချဉ်စော်ခါးသီးခြောက် အနည်းငယ်
(မရှိတော့ မုန်ညင်းချဉ်ထဲက အချဉ်ရေထည့်ပါတယ်၊ ရှာလကာရည်၊ သံပုရာရည် ချဉ်တာ ထည့်နိူင်ပါတယ်)
ပထမဆုံး အနှစ်အတွက် ငရုပ်သီး ကြက်သွန်ဖြူ ၊ ဂျင်းတွေကို ထောင်းထားပါ။ ငရုပ်သီးက ခွဲခြမ်း မညက်တညက်ဆို ပိုကောင်းပါတယ်၊
ကြက်သားကို ပုံမှန်ထက် အတုံးအနည်းငယ် သေးတုံးပြီး ဆနွင်းမှုန့်အနည်းငယ် ၊ ဆားသင့်ရုံ၊ ငရုပ်သီးထောင်းထားတဲ့ အနှစ်နဲ့နယ်ပြီး နာရီဝက်ခန့် နှပ်ထားပါ။
ပင်စိမ်းရွက်၊ နံနံ၊ မျှစ် ၊ ငရုပ်သီးစိမ်း တို့ကို ပါးပါးလှီးထားပါ၊
ဆီကို အိုးဇောက်နက်နက်ထဲ ထည့်တည်၊ ဆီပူလာရင် ကြက်သားနယ်ထားတာကို ဆီသတ်ပါတယ်၊ ကြက်သားရေကုန်ရင် ရေမြုတ် အောင်ထည့်ပြီး မျှစ်ပါထည့်တည်လိုက်ပါတယ်၊
ကြက်သားကျက်ပြီဆိုတာနဲ့ အချဉ်ရည်ထည့်၊ ပင်စိမ်း၊ နံနံ ငရုပ်သီးစိမ်း ပါးပါးလှီးထားတာထည့်ပါ၊
ဆား ၊အချဉ်၊အချို ညှိ ဟင်းကို ပြင် ၊ ရေလိုရင်ထပ်ထည့်ပြီး ရေဆူတဲ့ အထိ ထပ်တည်လိုက်ရင် ချက်ရလဲလွယ်၊ စားလို့လဲ အင်မတန် ခံတွင်းတွေ့တဲ့ ကြက်ကချင်ချက် ချဉ်ချဉ်စပ်စပ် မွှေးမွှေးလေး ရပါပြီ။
.jpg)
No comments:
Post a Comment