ကြွပ်တယ်၊ ရွတယ်၊ လှတယ် ... ပဲကြော်

မဆွိတီတို့အိမ်မှာ မုန့်ဟင်းခါးစားရင် ဘူးသီးကြော်နဲ့ပဲ စားလေ့ရှိတယ်။ မုန့်ဟင်းခါးကိုမှ မုန့်ဖတ်များများ၊ ပဲသီးတို့၊ ပူတီနာတို့၊ ဘူးသီးကြော်၊ ငါးဖယ်ကြော်တွေနဲ့ ငရုပ်သီးမှုန့်များများထည့် ဆီချက်ပါထည့်ပြီး သုတ်သလို နယ်ဖတ်စားလေ့ရှိတယ်။ စလုံးမှာတုံးကတော့ ဘူးသီးက ပေါတော့ မုန့်ဟင်းခါးချက်တဲ့နေ့ဆို ဘူးသီးကို ယိုးဒယား အကြော်မှုန့်လေးနဲ့နယ် လတ်လတ်ဆတ်ဆတ်ကြော်စားကြတယ်။

အိမ်မှာဦးခြ်ိမ့်က ဘူးသီးကြော် စပါယ်ရှယ်လစ်စ်။ သူက ဘူးသီးကြော်ကို မုန့်နှစ်တွေအများကြီးထည့် ကြက်သွန်ဖြူ၊ ဂျင်းလေးထောင်းထည့်၊ အချိုမှုန့် ဆိုဒါလေးပါ ထပ်ထည့်ပြီးကြော်တော့ အကြော်က ကြွပ်ရွနေတာပဲ။ ဒါပေမဲ့ဗျာ။ စလုံးက ဘူးသီးကြော် ဘယ်လောက်ကောင်းအောင်ကြော်ကြော် မဆွိတီတို့ ငယ်ငယ်က ခေါင်းပေါ်ဗန်းရွက်ပြီး လည်ရောင်းတဲ့ လက်တစ်ဝါးလောက်ရှိတဲ့ ဘူးသီးပေါင်းကြော်လောက်တော့ မချိုတာ အမှန်ပဲ။ ခုခေတ်ဘူးသီးတွေက ဓာတ်မြေသြဇာတွေနဲ့ကြီးလို့လားမသိဘူး။ ချိုကို မချိုဘူး။ ပေါ့ရွှတ်ရွှတ်နဲ့ဗျ။ ဘူးသီးကိုက အရသာမတူတာပါ။

ဦးခြိမ့်ကြော်တဲ့ ဘူးသီးကြော်

ဒီဖက်ရောက်တော့ ဘူးသီးကရှားတော့ မုန့်ဟင်းခါးကို ပဲကပ်ကြော်လေးနဲ့ပဲ စားရတော့တယ်။ အရင်ကတော့ မှတ်မှတ်သားသားမရှိပါဘူး။ ဒီလိုပဲ ကြော်စားလိုက်တာပဲ။ ဒီမှာ ခဏခဏကြော်နေရတော့ အချိုးအဆလေးကို မှတ်ထားလိုက်တယ်။ ပဲကပ်ကြော်ကြော်တာ မဖြစ်ဘူး၊ ကြေကုန်တယ်၊ တူးကုန်တယ်၊ ပျော့ကုန်တယ်ဆိုတဲ့ မမတွေအတွက် ကြော်နည်းလေး ရှယ်ပေးလိုက်ပါတယ်။

ပဲကပ်ကြော်က ရေနဲ့ အကြော်မှုန့်စပ်တဲ့ အချိုးက သိပ်အရေးကြီးတယ်။ တည်တဲ့ ဒယ်အိုးကလဲ non-sticker ဒယ်အိုး အောက်က ပြားနေမှ ကောင်းပါတယ်။ နောက်ပြီး အရေးကြီးတာက ဆီ အရမ်းကျက်မှ ထည့်ရင် မုန့်နှစ်က ကျဲတော့ အချပ်လိုက်မဖြစ်ပဲ အကုန်လုံးကျက်ပြီး မွစိကျဲကုန်ပါတယ်။ ကြော်တဲ့နေရာမှာ စိတ်ရှည်ဖို့လဲ လိုပါတယ်။

ပထမဆုံး ကုလားပဲကို တစ်ရက် (၂၄ နာရီ) လောက် ရေစိမ်ရပါတယ်။ ပဲက ရေစိမ်ပြီး ရေမလဲရင် ပုတ်အက်အက်အနံ့ထွက်လို့ ကြော်ခါနီး ရေနဲ့သေချာပြောင်အောင်ဆေးပြီး စကာနဲ့ စစ်ထားပါ။ လုပ်တဲ့ အမှုန့်က ယိုးဒယားမယ်အကြော်မှုန့်လို ဘယ်အကြော်မှုန့်မဆို ကြော်လို့ရနိူင်ပါတယ်။

အန်တီဆွိသုံးတဲ့ အကြော်မှုန့်ဖြစ်ပါတယ်။ အကြော်မှုန့်တွေက အချိုမှုန့်တို့၊ ကြက်သားမှုန့်တို့၊ ငရုပ်ကောင်း ဆော်ဒါ အကုန်ပါပြီးသားမှို့ ဘာမှထပ်ထည့်စရာမလိုပါ။

ရေ ၈၀ ml ကို ပုံမှာပြထားတဲ့ အတိုင်း အကြော်မှုန့် စားပွဲဇွန်း ၂ဇွန်းလောက် (အရမ်းမမောက်ပါ) ထည့်ပြီး နှံ့အောင်မွှေပေးပါ။ ဆန်ခြင်တဲ့ခွက်ကလေးတွေက အမှတ်အသားပါပါတယ်။ ပြီးတော့ ပဲစိမ်ထားတာ လက်တွင်းတစ်ဆုတ်စာလောက် နည်းနည်းထည့်မွှေပါ။ အထက်က အတိုင်းအတာက ပဲကပ်ကြော်တစ်ခုစာ ကွက်တိပါပဲ။ တစ်ခုစာလုပ်ရတဲ့ ရည်ရွယ်ချက်က ပဲကပ်ကြော်က မုန့်နှစ်များရင်၊ နဲရင်၊ ထူတာ၊ ပါးတာ၊ မကျက်တာတွေ ဖြစ်တတ်လို့ပါ။ (များများကြော်ချင်ရင် ကိုယ့်ဟာကိုယ် အချိုးအစားတွက်ကြည့်ပြီး တစ်ခါထဲ များများဖျော်ထားသင့်ပါတယ်။ ဒါပေမဲ့ တစ်ခုစာကတော့ မုန့်ဖျော်ပြီးသား ၈၀-၈၅ ml လောက်ပဲ ဆိုတာ မှတ်သားထားရပါမယ်၊ ဒယ်အိုးအဝိုင်းက အချင်း ၈လက်မရှိပါတယ်။)







ဒယ်အိုးကို မီး အနေတော် (medium) ထား၊ ဆီကို အကြော်မြုတ်ရုံလောက်ထည့်ပါ။ ဆီအရမ်းမကျက်ခင် တစ်မိနစ်လောက်မှာ မုန်နဲ့ပဲ အတူရောဖျော်ထားတာကို ထည့်ပါ။ မုန့်နှစ်တွေကို ဒယ်အိုး အဝိုင်းပုံအတိုင်းပြန့်သွားအောင် ဒယ်အိုးကို စကောဝိုင်းလိုလေး လှည့်ပေးပါ။


မုန့်က ထည့်ပြီး အတော်ကြာတဲ့အထိ မုန့်ပြားသလက် အပြားစားလို ခပ်ပျော့ပျော့ပါပဲ။ ပဲကပ်ကြော်လို ကြွပ်ရွလာလိမ့်မယ်လို့တောင် မထင်ရဘူး။ ဒါပေမဲ့ စိတ်ရှည်ရှည်ထားပြီး မီးအနေတော်လောက်နဲ့ ဖြေးဖြေးသာကြော်ပါ။ တစ်ချိန်မှာ အောက်ပိုင်းက အနည်းငယ်မာလာပြီး အချပ်လိုက်လေး ဖြစ်လာပါလိမ့်မယ်။ အဲဒီအချိန်ကျရင် တစ်ဖက်ကို လှန်ပေးရပါမယ်။ တဖက်ကို လှန်အပြီးပုံပါ။

ဒီလိုပဲ ဟိုဖက်ဒီဖက် ၂ခါလောက်စီ လှန်ပေးပြီး ကြွပ်ရွလာပြီ၊ အကျက်ညီလာပြီဆို ဆယ်လို့ရပါပြီ။ မီးအေးအေးနဲ့ စိတ်ရှည်လက်ရှည်သာ ကြော်ပါ။ မီးပြင်းရင် အကျက်မညီတတ်ပါဘူး။ တူးနံ့ထွက်မှာစိုးလို့ အရောင် အရမ်းမညိုခင်ချပါ။

ပဲကပ်ကြော်က ဒီတိုင်းထားတာတောင် တော်ရုံနဲ့ မပျော့ပါဘူး။ ဗူးတစ်ခုထဲမှာ လေလုံအောင်ပိတ်ထားရင် အကြာကြီး အထားခံပါတယ်။ အသုတ်ထဲမှာပဲထည့်ထည့်၊ မုန့်ဟင်းခါးနဲ့ပဲစားစား အရသာရှိလှတဲ့ ပဲကပ်ကြော်ပါ။