ရန်ကုန်စတိုင် ခေါက်ဆွဲကြော်

 

ဒီ‌ေခါက်ဆွဲကြော်ကို အားပေးတဲ့သူများလို့ ကြော်နည်းလေး တင်ပေးလိုက်ပါတယ်။

အမှန်ကတော့ ရန်ကုန်က တရုတ်ဆိုငေ်တွမှာလို မျိုး ခေါက်ဆွဲကြော်ဖြစ်ဖို့ဆို လျှို့ဝှက်ချက်တွေ နည်းနိသရတွေ တော်တော်များများလိုပါတယ်။

-တရုတ်ဆိုင်တွေကလို gas မီးဖိုပြင်းပြင်းရယ်၊ တရုတ်တွေကြော်တဲ့ ဆီ၀ နေတဲ့ ဒယ်အိုး  (wok) ကလဲ တကယ်ကိုလိုပါတယ်။ အိမ်မှာတော့ ဟင်းချက်ဝါသနာပါလို့ အဲလို လိုတာတွေဝယ်ထားတော့ အဆင်ပြေတယ်။ ဒါပေမဲ့ အဲဒါတွေမရှိလဲ အိမ်က မီးဖိုကို မီးအပြင်းဆုံးမှာထားပြီး ၂ယောက်စာလောက် အနဲငယ်ခွဲကြော်ရင်လဲ ရမယ်ထင်ပါတယ်။

-နောက်တစ်ခုက ခေါက်ဆွဲကြော်ကို စိုစိုအိအိလေးဖြစ်အောင် ဝက်ရိုးပြုတ်ရည်ပျစ်ပျစ်၊ ချိုချိုလေးနဲ့ ရောကြော်ရပါတယ်။

-ကြက်ဥကိုလဲ ခေါက်ဆွဲထည့်ပြီးမှ မထည့်ပဲ ပထဆုံး ဆီများများနဲ့ ကြော်ပြီး ခဏ ကော်ထား၊ ပြီးမှ ပြန်ရောကြော်ရင် ကြက်ဥညှီနံ့လုံးဝမရပဲ ဆီကိုကမွှေးနေပါတော့တယ်။ နောက်မှထည့်ရင် ကြက်ဥညှီနံ့ရတတ်ပါတယ်။

-ကြော်တဲ့ဆီကိုလဲ ဝက်ဆီဖတ်လေးတွေထည့်ပြီး အရင်ကြော်ထားရင် တကယ့်ကို တရုတ်ဆိုင်က အနံ့အတိုင်းရပါတယ်။

-နောက်တစ်ခုက တရုတ်နံနံပါ။ မရှိမဖြစ်ထည့်ရပါမယ်။ ဒါကလဲ ခေါက်ဆွဲကြော်ကို အနံ့မွှေးမွှေးလေးနဲ့ စားချင်စဖွယ်ဖြစ်စေတဲ့ လျှို့ဝှက်ချက်တစ်ခုပါ။ ဒီမှာတော့  တရုတ်နံနံ မရှိလို့ သူနဲ့ အမျိုးတူ celery အလယ်သားနုနုလေးတွေကို ပါးပါးလေးတွေလှီးပြီး ထည့်ကြော််ပါတယ်။

- ဂေါ်ဖီက မဖြစ်မနေ ထည့်ရပါတယ်။ သူက ချိုပြီး ခေါက်ဆွဲကြော်ကို အချိုအရသာ ပိုလေးစေပါတယ်။

- ခေါက်ဆွဲ ကလည်း အလုံးအရမ်းမတုတ်ပဲ အနေတော် အရွယ်လောက်ဆို ပိုကောင်းပါတယ်။

- ဟင်းခပ်မှုန့် - ရန်ကုန်ခေါက်ဆွဲကြော်အတိုင်း တူချင်ရင်တော့ ဟင်းခပ်မှုန့်က ကူမှကို ရပါမယ်

------------------------------------------------------------------------------------------------------

လျှို့ဝှက်ချက်တွေ ပြောပြီးတော့ ချက်နည်းလေး ရေးလိုက်ပါဦးမယ်။ အချိုးအဆတွေက ချက်ပြီးမှ မှန်းရေးထားတာဖြစ်လို့ ထုံးစံအတိုင်း အနည်းငယ် လိုတိုးပိုလျှော့လေး လုပ်ပေးပါ။ အဓိက က ဘယ်လို ကြော်လဲ လျှို့ဝှက်ချက်တွေက ဘာလဲဆိုတာသာ ရေးချင်တာပါ။

လူ ၅ ယောက်စာလောက်အတွက်လိုတဲ့ ပစ္စည်းတွေက

 ခေါက်ဆွဲ  1 kg

ဝက်သား ၃ထပ်သား အဆီများများ 100 gm - စင်တီမီတာ တစ်ဝက်သာသာလောက် သေးသေး          ရှည်ရှည်လေးတွေ လှီးထားပါ။

ဝက်သား အသားချည်း 300 gm - စင်တီမီတာ တစ်ဝက်သာသာလောက် သေးသေးရှည်ရှည်လေးတွေ လှီးပြီး ငရုပ်ကောင်း၊ ပဲငံပြာရည် အကြည်၊ အနောက်၊ ဆား၊ သကြား ဟင်းခတ်မှုန့်တို့နဲ့ သင့်သလိုနယ်ထားပါ။

ဝက်ရိုး 500 gm - ရေမြုတ်ရုံထည့်ပြီး ဆား၊ ငရုပ်ကောင်းထည့်ပြီး တစ်နာရီလောက် အချိုရည်ရအောင် (ခပ်ပျစ်ပျစ်) ပြုတ်ထားပါ။

 ( ဟင်းချိုရည် ပေါင်အိုး ဆန်ချင်ခွက် နဲ့ ၂ ခွက်စာလောက်)

ဂေါ်ဖီ ထုတ် တစ်စိတ် -  တစ်စင်တီမီတာလောက်အထူကို ရှည်ရှည်လေးတွေ လှီးထားပါ။

ဘိုစား ပဲသီး 150 gm - အစောင်းလေးတွေ လှီးထားပါ။

မုံလာဥနီ ၂တောင့် - အခွံသင်ပြီး ပါးပါးလှီးထားပါ။

တရုတ်နံနံ - လှီးပြီးသား  1 cup (ဆန်ချင်ခွက် တစ်ခွက်ခွဲခန့်)

ကြက်ဥ - ၄လုံးခန့်ကို  ဆား ငရုပ်ကောင်းအနည်းငယ်ထည့်ပြီး နာနာခေါက်ထားပါ။

ကြက်သွန်ဖြူဥ - ၄မွှာခန့် ညက်ညက်ထောင်းထားပါ

ပဲငံပြာရည် အနောက် (ကြာညို့)

ပဲငံပြာရည် အကြည်  

 ခရုဆီ

ဆီ

ဆား

သကြား

ဟင်းခတ်မှုန့်

ငရုပ်ကောင်း (white pepper)

  ပထမဆုံး သံဒယ်အိုးကို ဆီများများထည့် ပြီး ဝက်သား၃ထပ်သားလေးတွေ ထည့်ကြော်ပါ။ ဝက်ဆီဖတ်လိုဖြစ်သွားရင် ကော်ထားလိုက်ပါ။(ဆီများတယ်ထင်ရင် ဝက်ဆီဖတ်နဲ့ အတူ ဆီပါ ကော်ထားလိုက်ပါ)

ပြီးရင် ကြက်ဥခေါက်ထားတာကို ထည့်ကြော်ပါ။ မွှေကြော်ပြီး ကျက်ရင် ကော်ထားလိုက်ပါ။

အဲဒီဆီထဲကိုပဲ ဝက်သားလှီးထားတာလေးတွေကို ထည့်ကြော်ပါ။ မီးပြင်းရပါမယ်။

ခဏနေရင် ကြက်သွန်ဖြူ ထောင်းထားတာရယ် တရုတ်နံနံ အနည်းငယ်ရယ် ရောထည့်ကြော်လိုက်ပါ။

ဝက်သားလေးတွေ မွှေးပြီးကျက်လာပြီဆို အသီးအရွက်တွေဖြစ်တဲ့ ပဲသီးနဲ့ မုံလာဥနီလှီးထားတာထည့်ကြော်ပါ။ ခဏနေမှ ဂေါ်ဖီထည့်ပါ။

ကြက်ဥ ကြော်ပြီးသားရယ် ဝက်ဆီဖတ်ကြော်ပြီး ကော်ထားတာကို ထည့်ကြော်ပါ။

ပဲငံပြာရည် အကြည်၊ အနောက်၊ သကြား၊ ဟင်းခတ်မှုန့် အစရှိတာတွေကို ဟင်းရွက်တွေအရောင်လေးလှပြီး လေးလေးပင်ပင်ရှိအောင် သင့်သလို ထည့်ကြော်ပေးပါ။

နောက်ဆုံးမှ ခေါက်ဆွဲကို ထည့်ကြော်ပြီး မွှေပေးရပါမယ်။

ဝက်ရိုးပြုတ်ရည်ကိုလည်း ထည့်ကြော်ပြီး မွှေပေးပါ။ ဆီနဲတယ်ထင်ရင် စောနက ကော်ထားတာထည့်နိူင်ပါတယ်။

စောနက ပဲငံပြာရည် အကြည်အနောက် သကြား၊ ဟင်းခတ်မှုန့်၊ ခရုဆီ အစရှိတာတွေကိုလည်း လိုရင် ထပ်ထည့်ကြော်ပေးပါ။

( ခေါက်ဆွဲက ပြုတ်လဲ မပြုတ်ထားတဲ့အတွက် ပထမတော့ အတော်မာနေပါမယ်။ အဲဒါကို အရွက်ကြော်တွေက ထွက်တဲ့ အချိုရည်တွေရယ်၊ ဝက်ရိုးပြုတ်ရည်က အချိုရေတွေနဲ့ စိုအိနေအောင် ကြော်ရမှာ ဖြစ်ပါတယ်။ ခေါက်ဆွဲထဲ စိမ့်ဝင်သွားအောင် ကြော်လိုက်တော့ ခေါက်ဆွဲက အိပြီး အချိုတွေ အကုန်ကို အထဲ ကို ရောက်ပါတယ် - အဲဒါက ရန်ကုန်ခေါက်ဆွဲကြော် စိုစိုအိအိလေး ဖြစ်နေရခြင်းရဲ့ လျှို့ဝှက်ချက်ပါ)

နောက်ဆုံး အရည်တွေအကုန် ကုန်ပြီ ဆိုရင်တော့ တရုတ်နံနံလေးထည့်ပြီး ကိုယ့်စိတ်ကြိုက် အပေါ့ အလေး အချို ထပ်ပြင်နိူင်ပါတယ်။

 ပုံမှာ ပြထားတဲ့အတိုင် ရန်ကုန်ခေါက်ဆွဲ စိုစိုအိအိ ချိုချိုလေးရပါပြီ‌။

ဝက်စတူး ( Braised pork belly)

ဝက်စတူးကို မြန်မာပြည်ပြန်ရင် ရွှေဘဲတို့လို စားသောက်ဆိုင်တွေမှာပဲ စားဖူးတာပါ။

ဒီမှာတော့ ဆိုင်တွေမှာ ရှာမရတော့ အိမ်မှာပဲ စမ်းချက်ရတယ်။

ဝက်စတူးကို နည်း၂မျိုးနဲ့ လုပ်နိူင်ပါတယ်။

steam လုပ်ပြီး ပေါင်းတဲ့နည်းနဲ့ slower cooker နဲ့ ပေါင်းတဲ့နည်းပါ။

steam လုပ်တဲ့နည်းက မုန်ညင်းချဉ် အခြောက်နဲ့ ပေါင်းတာဖြစ်ပြီး အဆင့်တွေများတယ်။

ခုလုပ်တဲ့နည်းကတော့ ထမင်းပေါင်းအိုးက slow cooker နဲ့ပဲ အလွယ်ပေါင်းလိုက်တာပါ။

ဝက်စတူးလုပ်ဖို့ လူ ၃ယောက်စာအတွက် လိုအပ်တဲ့ပစ္စည်းတွေက

 - ဝက်သား သုံးထပ်သား (pork belly) ၅၀၀ ဂရမ်

-  rock sugar (သို့) ရိုးရိုးသကြား စားပွဲဇွန်း ၃ ဇွန်းခန့်

- တရုတ်ဟင်းချက်ဝိုင်  စားပွဲဇွန်း ၃ဇွန်းခန့်

- ပဲငံပြာရည် အကြည်ရည် စားပွဲဇွန်း ၃ဇွန်းခန့်

- ပဲငံပြာရည် အနောက်ရည် စားပွဲဇွန်း ၁ဇွန်းခန့်

- နာနတ်ပွင့်  (star anise) ၃ ပွင့်ခန့်

- ဂျင်း ပါးပါး ၂လွှာခန့်

- Sichuan pepper  ၂၀ ခုခန့် (optional, မပါလဲရပါတယ်)

- ဆီ စားပွဲဇွန်း ၂ဇွန်းခန့်

- ဟင်းခတ်မှုန့် သုံးတတ်ရင် အနည်းငယ်

ပထမဆုံး ဝက်သုံးထပ်သား က အခေါက်တွေကို ဒါးနဲ့ခြစ် ရေးဆေးပြီး လက်မဝက်လောက် strip လေးတွေ လှီးထားပါ။

အိုးထဲကို မီးအနေတော်နဲ့တည် ပူလာရင် ဆီ ၂ဇွန်းထည့်၊ ဆီကျက်ရင် သကြား နှစ်ဇွန်းလောက်ထည့်ပြီး သကြားလေးတွေ နီညိုရောင်သန်းလာသည်အထိ ပျော်အောင်မွှေပေးပါ။

ပြီးရင် ဝက်သားတွေထည့် ရဲနေအောင် ကြော််လိုက်ပါ။

ဝက်သားအရည်ကုန်တဲ့ အထိ မွှေပေးနေပြီး၊ အရည်ကုန်တာနဲ့ သကြား၊ ပဲငံပြာရည် အကြည်၊ အနောက်၊ နာနတ်ပွင့်၊ ဂျင်း၊ Sichuan pepper အစရှိသည်တိို့ကို ထည့်မွှေပေးပါ။

(ဒီနေရာမှာ ကြက်ဥ ကြိုက်တတ်ရင် ကြက်ဥတွေပြုတ်အခွံနွှာပြီး ထည့်နိူင်ပါတယ်)

ဝက်သားအထက် ရေ မြုတ်အောင်ထည့်င်္ပြီး slower cooker နဲ့ ၆ နာရီလောက်ပေါင်းလိုက်တဲ့အခါ ...

လျှာပေါ် ပျော်ဝင်သွားမလောက် နူးညံ့ပြီး ၊ အနံ့ အရသာနဲ့ပြည့်စုံတဲ့ ဝက်စတူးရပါပြီ။

ဝက်စတူးက ဆီပြန်မဟုတ်ပဲ အရည် စပ်စပ်လေးနဲ့ပါ။

အပေါ်က ingredient amount တွေက ချက်တုံးကသေချာ မမှတ်ထားလို့ ခန့်မှန်းချေသာ ဖြစ်ပါတယ်။

လိုတိုးပိုလျှော့လေးတော့ လုပ်ပေးကြပါလို့။

အရွက်တွေကတော့ မုန်ညင်းရွက်၊ ကန်ဇွန်းရွက် အစရှိတာတွေကို  စောနက ဝက်စတူးက အရည်ထဲကို ထည့်ပြုတ်၊ ပန်းကန် အောက်ကခံပြီး ပွဲလှအောင် ပြင်ထားတာပါ။

(edited on 21/01/2019)

Singapore style prawn mee soup

ဒီနေ့ အိမ်မှာ စင်္ကာပူ အမှတ်တရ prawn mee soup ချက်စားတယ်။

နောက်တစ်ခါချက်ရင် လွယ်အောင် ဒီမှာ လာပြီး မှတ်ထားလိုက်ဦးမယ်။

လူ ၅ယောက်စာအတွက်လိုတဲ့ ပစ္စည်းတွေက 

ပုဇွန် အလတ် ၁၅ကောင်ခန့်

ဝက်သား ၃၀၀ gm

ဝက်ရိုး တစ်ကေဂျီ

ပဲပင်ပေါက် တစ်ထုပ်

ကန်စွန်းရွက် တစ်စည်း

ကြက်သွန်ဖြူ ၅မွှာ

နာနတ်ပွင့် ၃ပွင့်

သစ်ဂျပိုးခေါက် တစ်ခု

လေးညှင်း (သိူ့) clove 5 ခုခန့်

ငရုပ်ကောင်း ၁၀ စေ့ခန့်

ထန်းလျှက် ၂လုံးခန့်

ပဲငံပြာရည် အနောက်ရည် စားပွဲဇွန်း တစ်ဇွန်း

ပဲငံပြာရည် အကြည်ရည် စားပွဲဇွန်း တစ်ဇွန်း

ငါးငံပြာရည် စားပွဲဇွန်း နှစ်ဇွန်း

Fish cake တစ်ခု

ပထမဆုံး ဝက်ရိုး တစ်ကေဂျီကို ရေ တစ်လီတာခွဲ ဂျင်းအနည်းငယ်ထည့်ပြီး ပြုတ်လိုက်ပါ။

ဝက်သားကိုလည်း အတုံးကြီးကြီး ၃တုံးခန့်တုံး ဆားနယ်ပြီး ဝက်နံရိုးပြုတ်ထဲ ထည့်ပြုတ်ပါ။

ပုဇွန်တွေကို ခေါင်းဖြတ်ပြီး အသားတွေကို ရေခဲသေတ္တာထဲ သပ်သပ်သိမ်းထားပါ။

 ဒယ်အိုးထဲ ဆီအနည်းငယ်ထည့်  (လဖက်ရည် နှစ်ဇွန်းခန့်) ကြက်သွန်ဖြူု၊ နာနတ်ပွင့်၊ သစ်ဂျပိုး၊ လေးညှင်း၊ ငရုပ်ကောင်း အစရှိတဲ့ ဟင်းခပ် အမွှေးအကြိုင်တွေကို ဆီသတ်ပါ။ ၂ မိနစ်လောက် သတ်ပြီးရင် ပုဇွန်ခေါင်းတွေ ထည့်လှော်ပြီး ၃မိနစ်လောက်ကြာလို့ ပုဇွန်ခေါင်းတွေ ခြောက်လာရင် စောနက တည်ထားတဲ့ ဝက်ရိုးပြုတ်အိုးထဲ ထည့်ပြီး တစ်နာရီခန့် မီးအေးအေးနဲ့ ပြုတ်ထားလိုက်ပါ။

ဒီကြားထဲ ဝက်သားထည့်ထားတာ နူးပြီဆို ဆယ်ထားပြီး ပါးပါးလေးတွေ လှီးထားပါ။

တစ်နာရီလောက်ကြာလို့ ဟင်းရည်က အချိုရည် ထွက်လာပြီဆို ပဲငံပြာရည် အကြည်၊ အနောက်၊ ထန်းလျှက်၊ ငါးငံပြာရည်တိို့ကို ထည့်ပြီး ဆားလိုက ထပ်ထည့်ကာ အရသာ အနေတော်ဖြစ်သည်အထိ ပြုပြင်ပြီး ၅မိနစ်ခန့် ထပ်တည်ထားပါ။

ဟင်းပွဲပြင်ရန်အတွက်ကတော့

စောနက prawn mee soup  ကို အရည်တွေချည်းရအောင် စကာကြဲကြဲနဲ့ စစ်ပြီး ဟင်းအိုးအသေးနဲ့ ခွဲတည်ပါ။

ခေါက်ဆွဲ၊ ကန်ဇွန်းရွက်၊ ပဲပင်ပေါက်တို့ကို စကာနှင့် ထည့်ပြီး prawn mee soup  ထဲထည့် ဖျောပြီး

ခေါက်ဆွဲ ပျော့လာရင် စားမည့် ပန်းကန်ထဲ ထည့်ပြင်ပါ။

ပုဇွန်ခွာထားတာ၊ ဝက်သားလှီးထားတာနှင့် fish cake လှီးထားတာတွေကိုလည်း တစ်ခုချင်းစီ စီပြီး လှပအောင်ပြင်ဆင်ထည့်ပါ။

နောက်ဆုံးမှ soup ကို ခေါက်ဆွဲ အသားတွေပေါ်မှ အသာလောင်းချကာ စားချင်စဖွယ် prawn mee ကို အရသာရှိစွာ စားနိူင်ပါပြီ။

ဖာလူဒါ ပြုလုပ်ခြင်း

ဖာလူဒါ လုပ်နည်းလေး မေ့သွားမှာစိုးလို့ ဒီမှာ လာမှတ်ထားလိုက်ပါတယ်။

 တီဆွိရဲ့ ပိတ်သတ်တွေလဲ လုပ်နည်းလေးသိတော့ လုပ်စားလို့ရတာပေါ့။

  လူ ၇၀ စာ ဖာလူဒါ အတွက်လိုအပ်တဲ့ ပစ္စည်းတွေကတော့

၁။ မုန့်လက်ဆောင်းဖတ်

၂။ ဘေဆယ်စေ့ (သို့) ပင်ပွား

၃။ သာကူစေ့

၄။ ကျောက်ကျောချောင်း ရောင်စုံများ

၅။ ကြက်ဥပူတင်း

၆။ နှားနို့

၇။ သကြားရည်

၈။ နိူ့စိမ်း (သို့) thick cream

၉။ vanilla ရေခဲမုန့်

၁။ မုန့်လက်ဆောင်းဖတ်လုပ်နည်း

အောက်ပါ youtube ကနေ reference ယူပါတယ်။

https://www.youtube.com/watch?v=gVF4nZxpzWA

ဆန်မှုန့် ဆန်ချင်ခွက် ၃ခွက်၊ tapioca အမှုန့် စားပွဲဇွန်း ၄ဇွန်းမောက်မောက်၊ pandan essence အရည် လဖက်စားဇွန်း ၂ ဇွန်းခန့်၊ ထုံးရည်ကြည် 500 ml တို့ကို ရောမွှေပြီး မီးဖိုပေါ် မီး medium နဲ့တည်ပါ။ အဆက်မပျက် မွှေပေးနေရပါတယ်။ မွှေနေရင်းနဲ့ ပျစ်လာရင် ရေအနည်းငယ်စီ လောင်းထည့်လိုက်၊ မွှေလိုက်နဲ့ မုန့်တွေ ပြောင်ချောလာပြီး ညောင်စေးကျလာရင်၊ sandal maker နဲ့ ရေခဲထည့်ထားတဲ့ ရေဇလုံထဲ ညှစ်ချပါ။ ရလာတဲ့ မုန့်လက်ဆောင်းဖတ်တွေကို ရေရောပြီး ရေခဲသေတ္တာထဲ သိမ်းဆည်းထားပါ။

၂။ ဘေဆယ်စေ့ (သို့) ပင်ပွား

sweet basil စေ့ အထုတ်ကို (ဆန်ချင်ခွက် တစ်ဝက်ခန့်) ဝယ်ပြီး ရေမြုတ်အောင် စိမ်ပါ။ ၅မိနစ်လောက်ကြာလို့ အစေ့လေးတွေက ပင်ပွားလေးတွေ ဖြစ်လာရင် အစိမ်းရောင် အရောင်ဆိုးဆေး လဖက်ရည်ဇွန်းဝက်ခန့် ထည့်ပြီး ခဏစိမ်ထားပါ။ ပြီးရင် အစိမ်းရောင်ဆိုးဆေးအရည်တွေကို ဆေးချ ၊ စစ်ချပြီး အစိမ်းရောင် ပင်ပွားလေးတွေကို ရေရောကာ ရေခဲသေတ္တာထဲမှာ သိမ်းဆည်းထားပါ။

၃။ သာကူစေ့

ရေနွေးကို ပွက်ပွက်ဆူအောင် ကျိုလိုက်ပါ။ ဆူလာရင် မီးကို medium ကို လျှော့လိုက်ပြီး သာကူစေ့ ဆန်ချင်ခွက် နှစ်ခွက် လောင်းထည့်၊ အောက်မှာ မကပ်အောင် အဆက်မပျက်မွှေပေးပါ။ မွှေတဲ့အခါ သံဇွန်းဆိုပိုကောင်းပါတယ်။ အရည်က အရမ်းစေးကပ်ပြီး ပျစ်နေတယ်ဆို ရေနွေးကို နည်းနည်းချင်းလောင်းထည့်ပြီး ကျဲသွားအောင် ပြုလုပ်ပါ။ မွှေနေရင်းနဲ့ သာကူစေ့တွေ အဆံပျောက်ရင် စကာနဲ့ စစ်ပြီး ရေအေးနဲ့ လောင်းချပါ။ ရေအေးအေးနဲ့ ၂ထပ်ခန့် ဆေးချပါ။ သာကူစေ့တွေ အေးသွားပြီဆိုရင်  အနီရောင် အရောင်ဆိုးဆေး လဖက်ရည် တစ်ဇွန်းခန့်ထည့်ပြီး ခဏ စိမ်ထားပါ။ ပြီးရင် အနီရောင်ဆိုးဆေးအရည်တွေကို ဆေးချ ၊ စစ်ချပြီး သာကူတွေကို ရေမြုတ်အောင်ရောကာ ရေခဲသေတ္တာထဲမှာ သိမ်းဆည်းထားပါ။

၄။ ကျောက်ကျောချောင်း ရောင်စုံများ

ကျောက်ကျောချောင်း ၂ထုတ် (70 gm ခန့်) ကို ရေ ဆန်ချင်ခွက် ၂၄ခွက်နဲ့ ရောကျိုပါ၊ သကြား ဆန်ချင်ခွက် တစ်ခွက်ထည့်ပါ။

ကျောက်ကျောကျိုနေစဉ် ကျာက်ကျော အရောင် ၃မျိုးအတွက် အအေးခံမည့် baking tray (သို့) လင်ပန်း ၃ခုကို အဆင်သင့်ပြင်ထားပါ။ အရောင်ဆိုးဆေး အစိမ်း၊ အနီ၊ အဝါ အဆင်သင့်ပြင်ထားပါ။

 ကျောက်ကျော ချောင်းများအားလုံး အရည်ပျော်သွားလျှင် အေးခဲမည့် လင်ပန်းတစ်ခုချင်းဆီမှာ ဆတူလောင်းထည့်ပြီး အရောင် တစ်မျိုးစီထည့်ပြီးမွှေပေးပါ။ အေးခဲသွားလျှင် ကျောက်ကျောကို အချောင်းသေးသေးရှည်ရှည်လေးတွေ လှီးထားပြီး ရေခဲသေတ္တာထဲမှာ သိမ်းဆည်းထားပါ။

၅။ ကြက်ဥပူတင်း

https://www.youtube.com/watch?v=AdhxJ9XcamM မုန့်ဖုတ်မည့် လင်ပန်းထဲသို့ သကြား ၅ဇွန်းမောက်မောက်ခန့် နှင့် ရေ ၁၀ ဇွန်းခန့်ထည့်ပြီး သကြားရည် ပျော်ဝင်သွားအောင်အရင်တည်လိုက်ပါ။ သကြားများ နီညိုရောင်သန်းလာပြီး အိုးမှာ ကပ်အောင် မီးအနည်းဆုံးနဲ့ တည်ပြီး အအေးခံထားပါ။

 ကြက်ဥ ၂၄ လုံး၊ နွားနို့ ဆန်ချင်ခွက် ၆ခွက်၊ နိူ့စိမ်း နှစ်ဗူး ၊ သကြား ဆန်ချင်ခွက် လေးပုံ၃ပုံ၊ vanilla အနံ့ အမွှေးရည် လဖက်ရည် ဇွန်း ၄ ဇွန်း ခန့်တို့ကို အားလုံးသမသွားအောင် စက်နဲ့ ၁၀ မိနစ်ခန့် မွှေပေးပါ။ ပြီးရင် မုန့်ဖုတ်မဲ့ လင်ပန်းထဲ လောင်းထည့်ပါ။ လင်ပန်း ၂ခုခန့်လိုမည်။ လင်ပန်းအကြီးထဲမှာ ရေတစ်ဝက်ခန့်မြှုတ်အောင်ထည့်ပြီး မုန့်ဖုတ်မည့်လင်ပန်းကို တင် အပူချိန် ၁၇၀ ဒီဂရီ စင်တီဂရိတ်နှင့် နာရီဝက်ခန့်ဖုတ်လျှင် ချိုမွှေးဆိမ့် အရသာရှိတဲ့ ပူတင်းရပါပြီ။ ပူတင်းတွေကို ဒါးဖြင့် လေးထောင့် အတုံးလေးတွေ လှီဖြတ်ပြီး ရေခဲသေတ္တာထဲ သိမ်းဆည်းထားပါ။

၆။ နှားနို့မှှေး

နွားနိူ့ ၂လီတာဗူး နှစ်ဗူးကို ဆူပွက်အောင်တည်ပြီး အအေးခံထားပါ။ အေးသွားလျှင် နှင်းဆီရည် (rose essence) လဖက်ရည်ဇွန်း ၄ဇွန်းခန့် ထည့်ပြီး မွှေပေးပါ။ ရေခဲသေတ္တာထဲ အအေးခံပြီး သိမ်းဆည်းထားပါ။

၇။ သကြားရည်

သကြား တစ်ကေဂျီထုတ် တစ်ထုတ်ကို ရေ 500 ml နဲ့ ရောကျိုပါ။ သကြား အရည်ပျော်သွားလျှင် နှင်းဆီရည် (rose essence) လဖက်ရည်ဇွန်း ၃ဇွန်း၊ အနီရောင် အရောင်ဆိုးဆေး လဖက်ရည်ဇွန်း တစ်ဇွန်းထည့်ပြီး သမအောင်မွှေကာ ရေခဲသေတ္တာထဲထည့်ကာ အအေးခံထားပါ။

၈။ နိူ့စိမ်း (သို့) thick cream

Thick cream ဗူးကြီး ၂ဗူးခန့်ဝယ်ထားပါ။ ( ဒီမှာတော့ Bulla တံဆိတ်က အကောင်းဆုံးပါ)

၉။ vanilla ရေခဲမုန့်

vanillaရေခဲမုန့် 2 litre ၃ဗူးခန့် ဝယ်ထားပါ။ (ဒီမှာတော့ Blue ribbon တံဆိတ်က အကောင်းဆုံးနဲ့ ဈေးအတော်ဆုံးပါပဲ)

ရေခဲမုန့်ပွဲပြင်ခြင်း

မတ်ခွက်လောက်ရှိတဲ့ အလှဖန်ခွက်ထဲကို ပထမဆုံး သကြား အနီရောင် အရည် စားပွဲဇွန်း ၂ဇွန်းထည့်ပါ။

ပြီးရင် နွားနို့ စားပွဲဇွန်း ၄ဇွန်းထည့်ပါ။ ကျန်တဲ့ ingredient တွေဖြစ်တဲ့  မုန့်လက်ဆောင်းဖတ်၊ ဘေဆယ်စေ့ (သို့) ပင်ပွား၊ သာကူစေ့၊  ကျောက်ကျောချောင်း ရောင်စုံများ ကို စားပွဲဇွန်း တစ်ဇွန်းဆီထည့်ပါ။ နို့စိမ်းကိုလည်း စားပွဲဇွန်းတစ်ဇွန်းထည့်ပါ။ ပူတင်း တစ်တုံး၊ ရေခဲမုန့် 1  scoop ကို အပေါ်ဆုံးကထည့်လိုက်ရင် စားချင့်စဖွယ် ဖာလူဒါ ရပါပြီ။

ဖက်ထုပ်ဆီချက်

ဒီနေ့ည ဖက်ထုတ်ဆီချက်လေး ရှိတာလေးတွေနဲ့ ဖြစ်သလို လုပ်စားတယ်။

နောက်တစ်ခေါက်လုပ်ရင် မေ့သွားမှာစိုးလို့ သတိရတုံးလေး ချရေးလိုက်ဦးမယ်။ ဖက်ထုပ်ကတော့ ပြီးခဲ့တဲ့ အပတ်ကထဲက လုပ်ထားတာလေးတွေ ကျန်နေတာပါ။

ဖက်ထုပ်အတွက် 

ဝက်သား အကြေ - ၄၀၀ ဂရမ် (အဆီပါတဲ့ ဝက်သားအကြေကိုရွေးပါ)

ပုဇွန် - ၃၀၀ ဂရမ် ( အခွံခွာပြီးသားဆို ၁၅၀ ဂရမ်ခန့်- ပုဇွန်ကို အခွံခွာ အညစ်အကြေးတွေ သန့်ရှင်းပြီး ဆား၊ ဆိုဒါလေးနည်းနည်းထည့် ရေအေးအေးနဲ့ ၅ခါလောက်ဆေးချ၊ ရေခြောက်အောင်သုပ်ပြီး၊ အတုံးသေးလေးတွေ တုံးထားပါ။)

တရုတ် မှိုခြောက် (Shiitake mushroom) - ၂ ခုခန့် (ရေ၄နာရီခန့်ကြိုစိမ်ပြီး အစိတ်သေးသေးလေးတွေ လှီးထားပါ)

ဆား - လဖက်ရည်ဇွန်း တစ်ဝက်

သကြား - လဖက်ရည်ဇွန်း ၂ ဇွန်း

ပဲငံပြာရည် အကြည်ရည် -  လဖက်ရည်ဇွန်း တစ်ဇွန်း

ခရုဆီ - လက်ဖက်ရည်ဇွန်း တစ်ဇွန်းမောက်မောက်

ငရုပ်ကောင်းမှုန့် အဖြူ - လဖက်ရည် ဇွန်းဝက်

နှမ်းဆီ - လဖက်ရည် ဇွန်းဝက်

ရိုးရိုးဆီ - လက်ဖက်ရည် ဇွန်း တစ်ဇွန်း

တရုတ်ဟင်းချက်ဝိုင် - လဖက်ရည် တစ်ဇွန်း

ကြက်ဥအကာ - တစ်လုံးစာ

ပြောင်းဖူးမှုန့် - လဖက်ရည် ၂ဇွန်းမောက်မောက်

တရုတ်မဆလာ - လဖက်ရည်ဇွန်း လေးပုံ တစ်ပုံခန့်

ဟင်းခပ်မှုန့် - သုံးတတ်ရင် လဖက်ရည်ဇွန်း လေးပုံ တစ်ပုံခန့်

အပေါ်က ingredient တွေ အားလုံးကို နှံ့နေအောင် ၅ မိနစ်ခန့် ရောနယ်၊

ပြီးရင် ဖက်ထုပ်ထဲထည့်ပိတ်ပြီး ဖက်ထုပ်ကို အဆင်သင့်ပြင်ထားပါ။

ဆီချက်ခေါက်ဆွဲအတွက်

ခေါက်ဆွဲ တစ်ကေဂျီ (chong mai noodle)

ကြက်သွန်ဖြူ ဥ ၁၅ မွှာခန့်  ( blender နဲ့ ကြိတ်ပြီး ဆီချက်ချက်ထားပါ။ မီးများရင် အပေါ်ရံ တူးပြီး အတွင်းမကျက်ဖြစ်တတ်လို့ မီးအေးအေးနဲ့ချက်ပါ)

ကြက်သွန်မြိတ် ၃ပင်ခန့် (ပါးပါးလှီးထားပါ)

ခေါက်ဆွဲ တစ်ကေဂျီ (chong mai noddle)

ကြက်ရိုးပြုတ်ရည် ၂ လီတာခန့်

ြ့ကက်ရိုးပြုတ်ရည်အတွက် ကြက်ရိုးများများ (တစ်ကေဂျီခန့်) ကို ဂျင်းနဲနဲ ငရုပ်ကောင်း ဆားနဲ့ ကြက်ရိုးပြုတ်ရည် ၃လီတာခန့် ရအောင်ပြုတ်ထားပါ။

ပြီးရင် အရည်ကို အိုးသေးတစ်လုံးထဲ စစ်ထည့်ပြီး ဖက်ထုပ်ကို အရင် ပြုတ်ပါ။ ၅ မိနစ်လောက်ပြုတ်ပြီး ဖက်ထုပ်လေးတွေ ဆယ်ထားပါ။

ခါတိုင်းတော့ ဆီချက်ခေါက်ဆွဲလုပ်ရင် ခေါက်ဆွဲအပြား ( egg noodle ) ကို သုံးပါတယ်။ သူက အပြုတ်မခံလို့ ခေါက်ဆွဲ တစ်မျိုးပြောင်းသုံးတာ တော်တော်ကောင်းတယ်။ chong mai noodle လို့ခေါ်ပါတယ်။

chong mai noodle ၃ပွဲစာပြင်လောက်ကို  စောနက ကြက်ရိုးပြုတ်ရည်ထဲ ထည့်ပြီး ၈ မိနစ်လောက်တော်တော်ကြာပြုတ်ရပါတယ်။ ဒါမှ ခေါက်ဆွဲလဲအိ၊ ကြက်ရိုးပြျုတ်ရည် အချိုက ခေါက်ဆွဲထဲ ဝင်ပြီး အရသာ ပိုရှိပါတယ်။ အဲဒီခေါက်ဆွဲက ဆား၊ ဟင်းချိုမှုန့် ဘာမှ ထပ်ထည့်စရာမလိုတော့ပါဘူး။

ခေါက်ဆွဲအိရင် ဆန်ကာနဲ့ စစ်ပြီး ပွဲပြင်လို့ရပါပြီ။

ပန်ကန်လုံးထဲကို ခေါက်ဆွဲအရင်ထည့်၊ ဖက်ထုပ်လေးတွေထည့်၊ ဆီချက်ထည့်၊ ကြက်သွန်မြိတ်လေးထည့်ပြီးစားရင် အင်မတန်မှ အနံ့အရသာနဲ့ ပြည့်စုံတဲ့ ဆီချက်ခေါက်ဆွဲရပါပြီ။

(ဒီညတော့ အိမ်မှာ ပြီးခဲ့တဲ့ အပတ်က ဆီချက်လုပ်ထားတာ ကျန်တာတွေရယ်၊  ကြက်ရိုးပြုတ်ကလဲ အဆင်သင့်၊ ဖက်ထုပ်ကလဲ ခေါက်ထားတာတွေ အဆင်သင့်ရှိတာနဲံ့ ဖက်ထုတ်လေးပြုတ်၊ ခေါက်ဆွဲလေးပြုတ်လိုက်ရုံနဲ့ ဂျုဂျူုလေးရဲ့ ခေါက်ဆွဲ စားချင်နေတဲ့ ဆန္ဒကို ဖြည့်ဆည်းပေးလိုက်ရတယ်။ )

အုန်းနိူ့ သာကူပြင်

သူငယ်ချင်းတွေ မေးကြလွန်းလို့ "အုန်းနိူ့ သာကူပြင်" လုပ်နည်းလေး ရှယ်ပေးလိုက်ပါတယ်။

သာကူပြင်အတွက်

သာကူစေ့ ၃၀၀ ဂရမ်

သကြား ၁၅၀ ဂရမ် 

ရေ တစ်လီတာခွဲ

အုန်းနိူ့ cream ၂၀၀ ml (cream ဗူးကိုသုံးပါတယ်)

ဆား လဖက်ရည်ဇွန်း တစ်ဇွန်း

----------------------------------------

အပေါ်က အုန်းနိူ့ပြင်အတွက်

အုန်းနိူ့ cream ၇၀၀ ml (cream ဗူးကိုသုံးပါတယ်)

နွားနိူ့ ၄၀၀ ml

သကြား ၂၄၀ ဂရမ်

ဂျုံမှုန့် ၁၀၀ ဂရမ်

ဆား လဖက်ရည်ဇွန်း တစ်ဇွန်း

---------------------------------------------------

သာကူပြင်အတွက် ...

ပထမဆုံး ရေကို ဆူအောင်တည်လိုက်ပါ။

ရေဆူရင် သကြား၊ ဆားနဲ့ သာကူကို ထည့်ပြီး ကျိုပေးပါ။

မီးကို အရမ်းမပြင်းစေပဲ medium အနေအထားလောက်နဲ့ အဆက်မပျက်မွှေပေးပါ။

မမွှေရင် အိုးကပ်တတ်လို့ပါ။

သာကူလေးတွေ အစေ့ပျောက်ခါနီးလောက်ရင် အုန်းနိူ့ cream လေးထည့်ပြီး ထပ်မွှေပေးပါ။ သာကူတွေ မျက်စေ့ပျောက်ပြီး စေးကပ်လာပြီ (ညောင်စေးကျလာပြီဆို) ဆီသုပ်ထားတဲ့ ဗန်းထဲထည့် အအေးခံထားပါ။

အပေါ်က အုန်းနိူ့ပြင်အတွက် ...

သာကူပြင်ကို အအေးခံထားစဉ်မှာ အုန်းနို့ပြင်အတွက် Ingredient တွေ အကုန်လုံးကို ကြက်ဥခေါက်တဲ့ မွှေတံနဲ့ နာနာခေါက်ပေးထားပါ။

ပြီးရင် မီးကို အရမ်းမပြင်းစေပဲနဲ့ အပူပေးပြီး အဆက်အပြတ် မွှေပေးပါ။ မီးအရမ်းပြင်းရင် ဗြုတ်တွေ အရမ်းထလာပြီး မမွှေနိူင်ပဲ ဖြစ်တတ်လို့ပါ။

ပထမတော့ ဗြုတ်လေးတွေ နဲနဲတော့ ထလာပါမယ်။ စိတ်မပူပါနဲ့ ။

မွှေနေရင်း မုန့်သား တဖြေးဖြေး ချောမွေ့လာမှာပါ။

မွှေနေရင်းနဲ့ မုန့်တွေ ပျစ်လာပြီး ညောင်စေးကျလာပြီဆိုရင် စောနက ခဲထားတဲ့ သာကူပြင်ပေါ် ဇွန်းလေးနဲ့ ခပ်ပြီး အသာလေး လောင်းချပါ။ (သာကူပြင်က လုံး၀ မခဲသေးတဲ့ အနေအထားဆိုတော့ အပေါ်က အားနဲ့ လောင်းချရင် ပုံပျက်သွားမစိုးလို့ပါ)။

အပေါ်က မုန့်သားကို ဆီသုပ်ထားတဲ့ ဇွန်းလေးနဲ့ မျက်နှာပြင်ခောျပေးပြီး oven ထဲမှာ အပူချိန် ၂၀၀ ဒီဂရီ စင်တီဂရိတ် နဲ့ ၁၅ မိနစ်ခန့် အပေါ်မီး ပေးပါ။

အပေါ်ရံလေး ညိုပြီးတင်းလာပါလိမ့်မယ်။ ပြီးရင် oven ထဲက ထုတ်ပြီး ၃-၄ နာရီလောက် ထားပြီး လုံး၀ အေးခဲသွားမှသာ မုန့်ကို လှီးဖြတ် စားသုံးနိူင်ပါပြီ။

..................................................................

တီဆွိလုပ်တဲ့အချိုးက အုန်းနိူ့ပြင်က တော်တော်ထူပါတယ်။ အဲလိုလေးထူမှလဲ စားရတာ အရသာပိုရှိပါတယ်။

အောက်က ဗီဒီယိုကတော့ ကိုယ်ထည့်တဲ့ အချိုးအဆတွေနဲ့ နဲနဲကွဲလွဲပါလိမ့်မယ်။

ဒီဗီဒီယိုကနေ သာကူနဲ့ အပေါ်က အုန်းန်ိူ့့ပြင်ကို ဘယ်လို texture အခြေအနေအထိ ကျိုပြီး ချရမလဲ ဆိုတာ ကြည့်လို့ရတာပေါ့။

Credit to original up loader.

https://www.facebook.com/groups/103279369835301/permalink/1109559232540638/

အုန်းနိူ့ cream 1kg တစ်ဗူးဆို အတော်ပါပဲ။

ဆိုဖီယာရဲ့နည်းကို အခြေခံပြီး အုန်းနို့ပြင်ထူထူလေးရအောင် လိုတိုးပိုလျှော့လေးလုပ်ထားတာပါ။

(သာကူကျိုပြီးတာနဲ့ oven ကို အဆင်သင့်ဖြစ်အောင် preheat 180 ဒီဂရီလောက် ဖွင့်ထားပေးပါ။)

ပလောင် တောင်ယာဟင်း

ဒီနေ့ နေ့လည်စာ ပလောင်တောင်ယာဟင်း ချက်စားတယ်။

တစ်ခါတစ်လေ ချက်နေကျ ဟင်းတွေစားရတာ ပျင်းလာလို့ ချက်ကြည့်တာ တော်တော် စားကောင်းတာပဲ။ 

ဟင်းက ဆီလဲမပါပဲ ဟင်းသီးဟင်းရွက်တွေနဲ့ အရည်သောက်လေးဆိုတော့ ကျန်းမာရေးနဲ့လဲ ညီညွတ်၊ စားရတာလဲ အဆင်ပြေတယ်။ ဦးခြိမ့်ကလဲ ကြိုက်တယ်တဲ့။

ချက်နည်းလေး အကြမ်းပျင်းရေးပြဦးမယ်။

ကြက်သားကို ခပ်လတ်လတ်လေးတွေတုံးပြီး ဆား၊ ဆနွင်းနဲနဲ၊စပါးလင်ပါးပါးလှီးထားတာလေးရယ်၊ နောက် ကြက်သွန်ဖြူ ဂျင်း ငရုပ်သီးခြောက်လေးတွေ ရောထောင်းထားတာနဲ့ နယ်ထားလိုက်ပြီး မီးဖိုပေါ်တင် မွှေပေး၊ ရေခမ်းလာရင် ရေကို တော်တော်များများထည့်ပြီး တည်ထားလိုက်။

ကြက်သားကျက်ရင် ဟင်းရည်ထဲကို မုန်ညင်းရွက်၊ မှို၊ မျှစ်၊ ကြက်သွန်နီ လေးစိပ်ခွဲ၊ ငရုပ်သီးစိမ်း လေးစိတ်ခွဲ၊ နံနံပင်လေးတွေ ခပ်ပြီး စားလို့ရပါပြီ။

ဆစ်ဒနီဆောင်းမှာ ရာသီဥတုအေးလွန်းလို့ ဒီလို ဟင်းရည် ပူပူ စပ်စပ်လေး လးက အလိုက်ဖက်ဆုံးပါပဲ။

(ပိန်းဥလေးတွေကတော့ သူ့မူရင်း ဟင်းထဲမှာမပါပါဘူး။ ကိုယ်က ကြိုက်လို့ဆို ကြက်သား ရေထည့်ကထဲကထည့်ချက်တာ ဟင်းက ပိုကောင်းသွားတယ်။ )

ချက်စားကြည့်ကြနော်.။ 

နေ့ခင်းက ပဟေဠိ တင်လိုက်တာ တာလပေါ၊ ကြက်ကချင်၊ အစုံပါပဲ။ အမှန်ကတော့ တိုင်းရင်းသားဟင်းတွေက ခပ်ဆင်ဆင်တွေပါပဲ။ တောင်ယာထဲ တောထဲက ဆွတ်လို့ ရတဲ့ ဟင်းရွကေ်တွ အကုန်ခပ်ကြတာ။ ဒါကတော့ ပလောင်တောင်ယာဟင်း recipe အတိုင်း ချက်ကြည့်တာပါ။