ယနေ့ နံနက်စာ မုန့်ပြားသလက်

မုန့်ပြားသလက် လုပ်မယ်ဆို ဘလော့ထဲ အရင်ရှာတာ၊ ရေးပြီးသားများ ရှိမလားလို့။

 မတွေ့တော့မှ မရေးရသေးပါလားဆို သတိရ။ ခုတော့ ကမန်းကတမ်းလေး ရေးလိုက်ပါပြီ။

မုန့်ပြားသလက်လုပ်နည်း (၁၀ခုစာခန့်)

ဆန်မှုန့် ဆန်ချင်ခွက် ၅ဗူး ကို ရေ ကြက်သီးနွေး ၆ဗူး (ဆန်မှုန့်ကို ချင်ရင် ခွက်ထဲကို သိပ် မထည့်ပါနဲ့)

Dry yeast လက်ဖက်ရည်ဇွန်း တစ်ဇွန်း

ဆား လက်ဖက်ရည်ဇွန်း တစ်ဇွန်း

ကြက်ဥ တစ်လုံးတို့ကို ရောပြီး နှံ့အောင် ကြက်ဥခေါက်တံနဲ့ နာနာမွှေပေးပါ။ ပြီးရင် တစ်ည သိပ်ထားပါ။ ချက်ချင်းစားရင်လဲ ရပေမဲ့မုန့်က သိပ်မပွပဲ နေပါ့မယ်။

နောက်နေ့မနက်ကျမှ non-sticker ဒယ်အိုး (သို့) ဆီ၀နေတဲ့ သံဒယ်အိုးထဲကို ဆီ လက်ဖက်ရည်ဇွန်း တစ်ဇွန်းခန့်ထည့်ပြီး ဆီနှံ့သွားအောင် ဒယ်အိုးကို စောင်းပြီး လှည့်လိုက်ပါ။

မီး medium အနေတော်မှာ ဆီက မီးခိုးတွေထွက်လာပြီး ဆီကျက်သွားရင် ယောက်ချိုဇွန်းခပ်လတ်လတ်နဲ့ မုန့်နှစ်ကို မွှေခပ်လိုက်ပြီး စောနက ဆီထဲ လောင်းထည့်ပါ။ မုန့်ပစ်သလက် တစ်ခုစာလောက် မှန်းထည့်ပါ။ 

ပဲပြုတ်နဲ့ နံနံ ကြက်သွန်မြိတ် ပါးပါးလှီးထားတာလေးတွေ အပေါ်က ဖြူးပြီး အဖုံးအုပ်ထားလိုက်ပါ။

ခဏနေရင် ဆီသုပ်ရအောင် ဆီခွက်လေး ဘေးမှာချပြီး ဇွန်းလေးနဲ့ မုန့်ပြားသလက် ဘေး၊ အပေါ်ကနေ ဆီသုပ်ပေးပြီး ပြန်အဖုံးအုပ်ထားပါ။ ဆီ ၀၀ သုပ်ပေးရပါတယ်။ တစ်ခုကို ဆီ လဖက်ရည်ဇွန်း ၃ဇွန်းလောက် ရှိမယ်။

မုန့်သားလေးတွေ ပွလာပြီ။ အဖြူရောင်ပျောက်ပြီဆိုချပြီး စားလို့ရပါပြီ။

(မုန့်နှစ် ပျစ်နေတယ်ထင်ရင် ရေထပ်ရောနိူင်ပါတယ်။ ဆန်မှုန့် အနေအထားပေါ်မူတည်ပြီး မုန့်နှစ်က အတိအကျ မရလို့ပါ။) 

အပေါ်က နှမ်းနဲ့ ဆားရောထောင်းထားတာလေး ဖြူးဖို့ မမေ့နဲ့ ဦးနော်။

အေပၚက ႏွမ္းနဲ႔ ဆားေရာေထာင္းထားတာေလး ျဖဴးဖို႔ မေမ့နဲ႔ ဦးေနာ္။

Takoyaki လုပ်စားရအောင်

Takoyaki လူ ၃ယောက်စာ အတွက် လိုအပ်တဲ့ ပစ္စည်းတွေကတော့

မုန်နှစ်ဖျော်ရန်အတွက်

၁) ဂျုံမှုန့် Wheat Plain flour - 2 cup

၂)  ရေ  ကြက်သီးနွေး  - Luke warm water- 720 ml

၃) ကြက်ဥ - Egg - 4 - ၄ လုံး

၄) ပဲငံပြာရည် အကြည်ရေ လဖက်ရည်ဇွန်း - Light  soy sauce - 2 tea spoon

၅) Dried bonito flakes - 1 gm (ညက်နေအောင်ချေထားပါ)

၆) Yeast - 1/4 tea spoon - လဖက်ရည်ဇွန်း လေးပုံ တစ်ပုံ

၇) ဆား - salt - 1/2 tea spoon - လဖက်ရည်ဇွန်း တစ်ဝက်

အထက်ပါ  ပစ္စည်းအားလုံးကို ရောပြီး ကြက်ဥမွှေတံနှင့် နာနာခေါက်ထားပါ။ Mix well above all ingredient.
 

မုန့်လုပ်ရန်အတွက်, to make Takoyaki

၁) Octopus - 500 gm (ပြုတ်ပြီး  တစ်စင်တီမီတာပတ်လည် အတုံးလေးတွေ တုံးထားပါ။) dice small pieces

၂) ကြက်သွန်မြိတ် Spring onion - 3 pcs - ၃ ပင်ခန့် (ပါးပါးရိတ်ရိတ်လေးတွေ လှီးထားပါ) small slice

၃) Pickled red ginger - 2 table spoon (ဂျင်းလေးတွေကို ပုံမှာပြထားတဲ့အတိုင်း သေးသေးလေးတွေ လှီးထားပါ)

၄) ဆီ - oil - စားပွဲဇွန်း ၅ဇွန်းခန့် - 5 table spoon

sausage ကြိုက်တတ်ရင် ထည့်လို့ရပါတယ်။  ပုံထဲက Octopus က ဟိုနေ့က လက်ကျန်လေးပါ။

ပွဲပြင်ရန်အတွက်, for preparation 

၁) Dried bonito flakes - 4 gm

၂)  Takoyaki Sauce (Tonkatsu sauce/Okonomi sauce)

3) Japanese mayonnaise

ပထမဆုံး မီးကို အနေတော် (Medium) နဲ့ Takoyaki မုန့်လုပ်မည့်အိုးကို ပူအောင်တည်လိုက်ပါ။ (Takoyaki အိုးက မြန်မာတွေ လုပ်တဲ့ မုန့်လင်မယား အိုးနဲ့ တူတူပါပဲ။)

ဆီလေးတွေ အနည်းငယ်စီ မုန့်ခွက်ကလေးတွေထဲကို လောင်းထည့်ပါ။

မုန့်နှစ်တွေကို မုန့်ခွက်လေးတွေအပြင် အပေါ်တွေပါ ပြည့်သွားအောင် အသာလောင်းထည့်ပါ။

မီးကို နဲနဲအေးအောင် ထားလိုက်ပါ။ မုန့်ခွက်ထဲက မုန့်တွေ အရမ်းကျက်ပြီး တူးသွားမစိုးလို့ပါ။

မီးအေးပြီးမှ မုန့်ခွက် တစ်ခုချင်းဆီထဲကို Octopus လှီးထားတာလေးတွေ တစ်ခုစီ (သို့) ၂ခုစီလောက်ထည့်ပါ။

pickle ginger နဲ့ ကြက်သွန်မြိတ်လှီးထားတာလေးတွေကို မုန့်တစ်အိုးလုံး အနှံ့ဖြူးပါ။

Pickle ginger က အချဉ်ဓာတ်ပါလို့ အနည်းငယ်သာထည့်ပါ။

မုန့်လေးတွေ မုန့်ခွက်လေးထဲက အောက်ခြေမှာ ကျက်ပြီဆို တူလေးနဲ့ အသာထိုးကော်ပြီး တစ်စောင်းလေးတွေ အရင်ထားပြီး လုံးလာအောင် တဖြေးဖြေး ကျက်တဲ့ဖက်ကို လှည့်ပေးပါ။ တူ၂ချောင်းကိုသုံးပြီး လှည့်ပေးတာ အလွယ်ဆုံးနည်းပါ။

မုန့်တွေ ခြောက်ပြီး ကပ်လာလို့ ဆီအနည်းငယ်ကိုလဲ လောင်းပေးပါ။

နောက်ဆုံးမှာ မုန့်လေးတွေလဲ လုံးလာပြီး ကြွပ်လာပြီ ရွှေဝါရောင်လေး ဖြစ်လာပြီဆို ချလို့ရပါပြီ။

အိမ်က အိုးလေးက တစ်ခါလုပ် ၁၂လုံး ရပါတယ်။

ပွဲပြင်ဖို့အတွက် Takiyaki ball လေးတွေကို ပန်းကန်ပြားထဲမှာ စီထည့်လိုက်ပါ။

အပေါ်ကနေ takiyaki sauce နဲ့ Japanese mayonnaise တွေကို လှအောင် လေးထောင့် အကွက်ပုံလေးဖော်ပြီး ဖြူးလိုက်ပါ။

နောက်ဆုံး  Dried bonito flakes လေးတွေ ဖြူးလိုက်ရင် စားချင့်စဖွယ် Takoyaki Ball လေးတွေ ဖြစ်သွားပါပြီ။

တရုတ် စတိုင် ဝက်သား မှို အချိုချက်

ဒီနေ့ ညနေ ချက်စား ဖြစ်တဲ့ ဟင်းလေးပါ။ ဆီလဲမပါပဲ စားလို့အရမ်းကောင်းလို့ နောက်ချက်ရင် မှတ်မိအောင်  ချက်နည်းလေး လာမှတ်ထားပါတယ်။

လူ ၅ယောက်စာခန့် လိုအပ်တဲ့ ပစ္စည်းတွေက

ဝက်သား အဆီ အသား - တစ်ကေဂျီ

ကြွက်နားရွက်မှို - ၁၅ ခုခန့်

Shiite mushroom - ၅ပွင့်ကို ရေစိမ်ပြီး ထပ်ခြမ်းခြမ်းထားပါ။

ပဲလိပ် - ၂ချောင်းခန့် ၄ပိုင်းချိုးပြီး ရေစိမ်ထားပါ။

ကြက်ဥ ၆ လုံး - ရေ မြုတ်အောင်ထည့်ပြီး မိနစ် ၂၀ခန့်ပြုတ်ပြီး ခွာထးပါ။

ကြက်သွန် ဥသေး - ၆ဥခန့် - အခွံနွှာထားပါ။

ဆီသတ်ရန်အတွက်

ဂျင်း - ပါးပါး ၆လွှာခန့်

ကြက်သွန်ဖြူ - ၁၀ မွှာခန့် - ဓားပြားရိုက်ထားပါ။

နာနတ်ပွင့် - star anise - ၃ပွင့်ခန့်

သကြား - 2 table spoon

ဆီ -  2 table spoon

sauce အတွက်

တရုတ် မဆလာ - 5 spice powder - 1 tea spoon

ငရုပ်ကောင်း မှုန့် - white pepper - 1  tea spoon

ပဲငံပြာရည် - အကြည်ရည် - 6 table spoon

ပဲငံပြာရည် - အနောက်ရည် - 2 table spoon

သကြား - 2 table spoon

ခရုဆီ - oyster sauce - 2 table spoon

တရုတ်ဟင်းချက်ဝိုင် - 2 table spoon

--------------------------------------------------------------

 ပထမဆုံး ဝက်သားကို သန့်စင်ပြီး အိုးတစ်လုံးထဲ  ရေအေး မြုတ်အောင်ထည့်၊ မီးအနေတော်နဲ့ ရေဆူလာအောင်တည်လိုက်ပါ။

ရေ စ ဆူတာနဲ့ ဝက်သားကို ထုတ်လိုက်ပြီး ရေခပ်အေးအေးနဲ့ဆေးချပါ။

ပြီးရင် တစ်လက်မခွဲ ပတ်လည် အတုံးခပ်ကြီးကြီတွေ တွုံးထားပါ။

ဆီသတ်မဲ့ ဒယ်အိုးထဲကို ဆီထည့် ၊ ဂျင်း၊ ကြက်သွန်ဖြူ၊ နာနတ်ပွင့်တွေ ထည့်ပြီး ဆီသတ်ပါ။

အနံ့ အနည်းငယ်သင်းလာရင် သကြား ၂ဇွန်းထည့်ပြီး မွှေပေးပါ။

နီညိုရောင်သန်းလာရင် ဝက်သားထည့်ပြီး မွှေပေးပါ။

ဝက်သားတွေ အရည်ကုန်သွားရင် အပေါ်က ဆော့စ် ဖောျ်ထားတာထည့်မွှေပေးပါ။

ရေ ဝက်သားမြှုတ်အောင်ထည့်ပြီး ဆူပွက်သည်အထိ တည်ပေးပါ။

ပြီးရင် slow cooker ထဲ ပြောင်းထည့်ပြီး  တည်ရပါမယ်။

slow cooker တစ်နာရီခန့်ကြာရင် မှိုတွေ၊ ကြက်ဥတွေ၊ ပဲလိပ်တွေ အားလုံးကို အရည်ထဲ အားလုံးမြုတ်အောင် ထည့်ပြီး နောက်ထပ် ၂နာရီခန့်တည်ရပါမယ်။

ချခါနီး စိတ်ကြိုက် အပေါ့ အငံအချို ပြင်ပြီး အနံ့အရသာနဲ့ ပြည့်စုံတဲ့ တရုတ် ဝက်သားမှိုဟင်း ရပါပြီ။

မုန့်လင်မယား

ဆရာ Eric ရဲ့ နည်းနဲ့လုပ်ထားတာ။

ဆရာရဲ့ video က ရှည်လွန်းလို့ အမြန်နည်း ရေးပေးလိုက်ပါတယ်။

အချိုမှုန့်မပါ၊ ဆော်ဒါမပါတာ ကြိုက်လို့ သူ့နည်းအတိုင်း လုပ်ကြည့်တာပါ။

မုန့်လင်မယားလုပ်နည်း (ဆရာ Eric နည်း)

ဆန်မှုန့် တစ်ခွက် ၊ ပဲမှုန့် တစ်ဇွန်း၊ ကောက်ညှင်းမှုန့် တစ်ဇွန်း၊ အကြော်မှုန့် တစ်ဇွန်းကို ရောပြီး စကာ အရင်ချပါ။

ပြီးရင် ရေ ကြက်သီးနွေး တစ်ခွက် နဲ့ အရင်ရောပြီး ကြက်ဥခေါက်တံနဲ့ တစ်ဖက်တည်းကို လှည့် မွှေပေးပါ။

ဆား လက်ဖက်ရည် ဇွန်းဝက်လျော့လျော့ ကိုလည်း ထည့်မွှေပေးပါ။

ကြက်သွန်မြိတ်ကိုလည်း ပါးပါးလေးတွေ လှီးပြီး မုန့်နှစ်ရည်ထဲ ထည့်မွှေပါ။

ရေ အရမ်းပျစ်နေရင် အခြေအနေကြည့်ပြီး ရေအနည်းငယ် ထပ်ထည့်နိူင်ပါတယ်။

မုန့်လုပ်တော့မယ်

မုန့်လင်မယား အိုးကို မီးအနေတော်နဲ့ တည်၊ ဆီအနည်းငယ်စီထည့် ၊ ဆီကျက်လာရင် မုန့်နှစ်ထည့်၊ ပဲပြုတ်ကို အပေါ်က ၄- ၅ စေ့လောက်ဖြူးပြီး ၃မိနစ်ခွဲလောက် စောင့်ရင် မုန့်လင်မယားလေးတွေကို ကော်လို့ရပါပြီ။

ကြွပ်ရွနေတဲ့ မုန့်လေးတွေကို ဆားနဲ့ နှမ်းရော ထောင်းထားတာလေးနဲ့ ဖြူးစားပါတယ်။

အင်မတန်အရသာရှိတဲ့ မြန်မာ့ရိုးရာ မုန့်လေးပါ။

(အန်တီဆွိက မုန့်မကြွပ်မှာ စိုးရိန်လို့ ကြက်ဥ ခေါက်ထားတာ တစ်ဇွန်းရယ် ၊ yeast 1/4 teaspoon ထည့်ထားပါတယ်)

ခွက် = အနောက်တိုင်း အတိုင်းအတာ 1 cup ပါ။

ဆရာ Eric ရဲ့ မူရင်း video file

https://www.facebook.com/eric.yang.566/videos/10215811141664807/

Hot Plate Tofu (သို႔) Tie Ban Tofu

 

ပြီးခဲ့တဲ့ အပတ်က စင်္ကာပူမှာတုံးက ကျဲပန်တို့ဟူးဆိုပြီး မှာစားရတဲ့ တို့ဖူးကြော်လေး အိမ်မှာ လုပ်စားတယ်။

ချက်နည်းမေးတဲ့ သူတွေအတွကေ်ရာ နောက်တစ်ခါချက်ရင် မှတ်မိအောင် ချက်နည်းလေး ရှယ်ပေးလိုက်ပါတယ်။

ကျဲပန်တို့ဟူး ၆ယောက်စာအတွက်

- ဝက်သား အကြေ -  ၃၅၀ ဂရမ် - ပြောင်းဖူးမှုန့်တစ်ဇွန်း ၊နှမ်းဆီ၊ ပဲငံပြာရည် အကြည်ဇွန်းဝက်၊           ငရုပ်ကောင်းမှုန့် အနည်းငယ် တို့နှင့်နယ်ထားပါ။

- ပုဇွန် - အကောင် အလတ် ၁၀ကောင်ခန့် - အခွံတွေ အားလုံးနွှာပြီး ဗိုက်ခွဲ သန့်ရှင်းထားပါ။

- silken egg tofu - ၄ ခု  - ၁ စင်တီလောက်အထူလေးတွေ လှီးထားပါ။

- ကြက်ဥ ၄လုံး - ငရုပ်ကောင်း၊ ဆားအနည်းငယ်ထည့်ပြီး နာနာ ခေါက်ထားပါ။

- ရွှေပဲသီး - ၂၀ တောင့်ခန့် - အတောင့်လိုက်ကို အနား၂ဖက် ဖြတ်ထားပါ။

- baby corn - ၁၀ ခုခန့် -  ထပ်ခြမ်းခြမ်းထားပါ။

- မှို - ၈ ခုခန့် - လေးစိပ်စိပ်ထားပါ။

- မုန်လာဥနီ - နှစ်ဥ - အဝိုင်းလိုက် ပါးပါး လှီးထားပါ။

 - ကြက်သွန်မြိတ် - ၃ ပင်ခန့် - ပါးပါးလေးတွေ လှီးထားပါ။

- ဂျင်း - တစ်စင်တီလောက်အထူ -  ညက်ညက်ထောင်းထားပါ။

- ကြက်သွန်ဖြူ - ၅ မွှာခန့် - ညက်ညက်ထောင်းထားပါ။

 - ကော်မှုန့် တစ်ဇွန်းခွဲ - ရေ တစ်ခွက် နှင့် ဖျော်ထားပါ။

- chilli bean suace -  ၂ ဇွန်း

- ပဲငံပြာရည် အကြည်ရည် - နှစ်ဇွန်း

- တရုတ်ဟင်းချက်ဝိုင် - နှစ်ဇွန်း

- ခရုဆီ - တစ်ဇွန်း

- သကြား -  တစ်ဇွန်းခန့်

- ဆီ - ၂ ဇွန်း ခန့်

( ဇွန်း = စားပွဲဇွန်း)

-ပထမဆုံး ဒယ်အိုးထဲမှာ တို့ဟူးလှီးထားတာကို ဆီမြုတ်အောင် ထည့်ပြီး ကြော်လိုက်ပါ။

 အပေါ်ရံတွေ အနည်းငယ် ကြွပ်ပြီး တင်းလာရင် ဆယ်ပြီး ဆီစစ်ထားပါ။

- ပြီးရင် အသားနဲ့ ဟင်းရွက်တွေကို ကြော်ပါမယ်။

 ဒယ်အိုးထဲကို ဆီတစ်ဇွန်းခန့်ထည့်ပြီး ဂျင်း၊ ကြက်သွန်ဖြူကို ဆီသတ်ပါ။

အနည်းငယ်အညိုရောင် သန်းလာရင် ဝက်သားအကြေကို ထည့်ပြီး ကြော်ပါ။

 ဝက်သား အရည်တွေကုန်ပြီး အနံ့မွှေးလာရင် ပုဇွန်နဲ့ အသီးအရွက်တွေ ထည့်ကြော်ပါ။

 Black bean chilli sauce၊ ပဲငံပြာရည် အကြည်ရည်၊ သကြား၊ ခရုဆီ အစရှိတာတွေကိုလည်းထည့်ပြီး မွှေပေးပါ။

အသီးအရွက်တွေ ကျက်ရင် ကော်ရည်လောင်းထည့် အပေါ့အငံ အရသာမြည်းကြည့်ပြီး လိုတာ ထပ်ထည့်ပြီး ကိုယ့်စိတ်ကြိုက်ပြင်ပါ။

 

- အသားတွေနဲ့ ဟင်းရွက်တွေ ချက်နေတုံးမှာပဲ တပြိုင်နက်တည်း တခြား မီးဖိုတစ်ခုနဲ့ hot plate ကို ဆီအနည်းငယ် သုပ်ပြီး မီးပြင်းပြင်းမှာ ပူကျက်နေအောင် အပူပေးပါ။

 ပူလာရင် မီးပိတ်ပြီး အပေါ်က ကြက်ဥ  လောင်းထည့်ပါ။

 ကြက်ဥတွေ ပြန့်သွားအောင် ဒယ်အိုးကို လှည့်ပေးပါ။ ကြက်ဥတွေ ကျက်သွားရင် အပေါ်ကနေ တို့ဟူးတွေကို အရင်စီထည့်ပါ။

 ပြီးမှ စောနက ချက်ထားတဲ့ အသီးအရွက်နဲ့ အသားတွေကို အပေါ်ကနေလောင်းချ၊ ကြက်သွန်မြိတ်ပါးပါး လှီးထားတာဖြူးပြီး စားနိူင်ပါပြီ။

တစ်ခါစားပြီး ဘယ်တော့မှ မမေ့နိုင်တဲ့ အင်မတန်မှ အနံ့အရသာနဲ့ပြည့်စုံတဲ့ Hot plate tofu (သို့့) ကျဲပန်တို့ဟူး ဖြစ်ပါတယ်။

ရန်ကုန်စတိုင် ခေါက်ဆွဲကြော်

 

ဒီ‌ေခါက်ဆွဲကြော်ကို အားပေးတဲ့သူများလို့ ကြော်နည်းလေး တင်ပေးလိုက်ပါတယ်။

အမှန်ကတော့ ရန်ကုန်က တရုတ်ဆိုငေ်တွမှာလို မျိုး ခေါက်ဆွဲကြော်ဖြစ်ဖို့ဆို လျှို့ဝှက်ချက်တွေ နည်းနိသရတွေ တော်တော်များများလိုပါတယ်။

-တရုတ်ဆိုင်တွေကလို gas မီးဖိုပြင်းပြင်းရယ်၊ တရုတ်တွေကြော်တဲ့ ဆီ၀ နေတဲ့ ဒယ်အိုး  (wok) ကလဲ တကယ်ကိုလိုပါတယ်။ အိမ်မှာတော့ ဟင်းချက်ဝါသနာပါလို့ အဲလို လိုတာတွေဝယ်ထားတော့ အဆင်ပြေတယ်။ ဒါပေမဲ့ အဲဒါတွေမရှိလဲ အိမ်က မီးဖိုကို မီးအပြင်းဆုံးမှာထားပြီး ၂ယောက်စာလောက် အနဲငယ်ခွဲကြော်ရင်လဲ ရမယ်ထင်ပါတယ်။

-နောက်တစ်ခုက ခေါက်ဆွဲကြော်ကို စိုစိုအိအိလေးဖြစ်အောင် ဝက်ရိုးပြုတ်ရည်ပျစ်ပျစ်၊ ချိုချိုလေးနဲ့ ရောကြော်ရပါတယ်။

-ကြက်ဥကိုလဲ ခေါက်ဆွဲထည့်ပြီးမှ မထည့်ပဲ ပထဆုံး ဆီများများနဲ့ ကြော်ပြီး ခဏ ကော်ထား၊ ပြီးမှ ပြန်ရောကြော်ရင် ကြက်ဥညှီနံ့လုံးဝမရပဲ ဆီကိုကမွှေးနေပါတော့တယ်။ နောက်မှထည့်ရင် ကြက်ဥညှီနံ့ရတတ်ပါတယ်။

-ကြော်တဲ့ဆီကိုလဲ ဝက်ဆီဖတ်လေးတွေထည့်ပြီး အရင်ကြော်ထားရင် တကယ့်ကို တရုတ်ဆိုင်က အနံ့အတိုင်းရပါတယ်။

-နောက်တစ်ခုက တရုတ်နံနံပါ။ မရှိမဖြစ်ထည့်ရပါမယ်။ ဒါကလဲ ခေါက်ဆွဲကြော်ကို အနံ့မွှေးမွှေးလေးနဲ့ စားချင်စဖွယ်ဖြစ်စေတဲ့ လျှို့ဝှက်ချက်တစ်ခုပါ။ ဒီမှာတော့  တရုတ်နံနံ မရှိလို့ သူနဲ့ အမျိုးတူ celery အလယ်သားနုနုလေးတွေကို ပါးပါးလေးတွေလှီးပြီး ထည့်ကြော််ပါတယ်။

- ဂေါ်ဖီက မဖြစ်မနေ ထည့်ရပါတယ်။ သူက ချိုပြီး ခေါက်ဆွဲကြော်ကို အချိုအရသာ ပိုလေးစေပါတယ်။

- ခေါက်ဆွဲ ကလည်း အလုံးအရမ်းမတုတ်ပဲ အနေတော် အရွယ်လောက်ဆို ပိုကောင်းပါတယ်။

- ဟင်းခပ်မှုန့် - ရန်ကုန်ခေါက်ဆွဲကြော်အတိုင်း တူချင်ရင်တော့ ဟင်းခပ်မှုန့်က ကူမှကို ရပါမယ်

------------------------------------------------------------------------------------------------------

လျှို့ဝှက်ချက်တွေ ပြောပြီးတော့ ချက်နည်းလေး ရေးလိုက်ပါဦးမယ်။ အချိုးအဆတွေက ချက်ပြီးမှ မှန်းရေးထားတာဖြစ်လို့ ထုံးစံအတိုင်း အနည်းငယ် လိုတိုးပိုလျှော့လေး လုပ်ပေးပါ။ အဓိက က ဘယ်လို ကြော်လဲ လျှို့ဝှက်ချက်တွေက ဘာလဲဆိုတာသာ ရေးချင်တာပါ။

လူ ၅ ယောက်စာလောက်အတွက်လိုတဲ့ ပစ္စည်းတွေက

 ခေါက်ဆွဲ  1 kg

ဝက်သား ၃ထပ်သား အဆီများများ 100 gm - စင်တီမီတာ တစ်ဝက်သာသာလောက် သေးသေး          ရှည်ရှည်လေးတွေ လှီးထားပါ။

ဝက်သား အသားချည်း 300 gm - စင်တီမီတာ တစ်ဝက်သာသာလောက် သေးသေးရှည်ရှည်လေးတွေ လှီးပြီး ငရုပ်ကောင်း၊ ပဲငံပြာရည် အကြည်၊ အနောက်၊ ဆား၊ သကြား ဟင်းခတ်မှုန့်တို့နဲ့ သင့်သလိုနယ်ထားပါ။

ဝက်ရိုး 500 gm - ရေမြုတ်ရုံထည့်ပြီး ဆား၊ ငရုပ်ကောင်းထည့်ပြီး တစ်နာရီလောက် အချိုရည်ရအောင် (ခပ်ပျစ်ပျစ်) ပြုတ်ထားပါ။

 ( ဟင်းချိုရည် ပေါင်အိုး ဆန်ချင်ခွက် နဲ့ ၂ ခွက်စာလောက်)

ဂေါ်ဖီ ထုတ် တစ်စိတ် -  တစ်စင်တီမီတာလောက်အထူကို ရှည်ရှည်လေးတွေ လှီးထားပါ။

ဘိုစား ပဲသီး 150 gm - အစောင်းလေးတွေ လှီးထားပါ။

မုံလာဥနီ ၂တောင့် - အခွံသင်ပြီး ပါးပါးလှီးထားပါ။

တရုတ်နံနံ - လှီးပြီးသား  1 cup (ဆန်ချင်ခွက် တစ်ခွက်ခွဲခန့်)

ကြက်ဥ - ၄လုံးခန့်ကို  ဆား ငရုပ်ကောင်းအနည်းငယ်ထည့်ပြီး နာနာခေါက်ထားပါ။

ကြက်သွန်ဖြူဥ - ၄မွှာခန့် ညက်ညက်ထောင်းထားပါ

ပဲငံပြာရည် အနောက် (ကြာညို့)

ပဲငံပြာရည် အကြည်  

 ခရုဆီ

ဆီ

ဆား

သကြား

ဟင်းခတ်မှုန့်

ငရုပ်ကောင်း (white pepper)

  ပထမဆုံး သံဒယ်အိုးကို ဆီများများထည့် ပြီး ဝက်သား၃ထပ်သားလေးတွေ ထည့်ကြော်ပါ။ ဝက်ဆီဖတ်လိုဖြစ်သွားရင် ကော်ထားလိုက်ပါ။(ဆီများတယ်ထင်ရင် ဝက်ဆီဖတ်နဲ့ အတူ ဆီပါ ကော်ထားလိုက်ပါ)

ပြီးရင် ကြက်ဥခေါက်ထားတာကို ထည့်ကြော်ပါ။ မွှေကြော်ပြီး ကျက်ရင် ကော်ထားလိုက်ပါ။

အဲဒီဆီထဲကိုပဲ ဝက်သားလှီးထားတာလေးတွေကို ထည့်ကြော်ပါ။ မီးပြင်းရပါမယ်။

ခဏနေရင် ကြက်သွန်ဖြူ ထောင်းထားတာရယ် တရုတ်နံနံ အနည်းငယ်ရယ် ရောထည့်ကြော်လိုက်ပါ။

ဝက်သားလေးတွေ မွှေးပြီးကျက်လာပြီဆို အသီးအရွက်တွေဖြစ်တဲ့ ပဲသီးနဲ့ မုံလာဥနီလှီးထားတာထည့်ကြော်ပါ။ ခဏနေမှ ဂေါ်ဖီထည့်ပါ။

ကြက်ဥ ကြော်ပြီးသားရယ် ဝက်ဆီဖတ်ကြော်ပြီး ကော်ထားတာကို ထည့်ကြော်ပါ။

ပဲငံပြာရည် အကြည်၊ အနောက်၊ သကြား၊ ဟင်းခတ်မှုန့် အစရှိတာတွေကို ဟင်းရွက်တွေအရောင်လေးလှပြီး လေးလေးပင်ပင်ရှိအောင် သင့်သလို ထည့်ကြော်ပေးပါ။

နောက်ဆုံးမှ ခေါက်ဆွဲကို ထည့်ကြော်ပြီး မွှေပေးရပါမယ်။

ဝက်ရိုးပြုတ်ရည်ကိုလည်း ထည့်ကြော်ပြီး မွှေပေးပါ။ ဆီနဲတယ်ထင်ရင် စောနက ကော်ထားတာထည့်နိူင်ပါတယ်။

စောနက ပဲငံပြာရည် အကြည်အနောက် သကြား၊ ဟင်းခတ်မှုန့်၊ ခရုဆီ အစရှိတာတွေကိုလည်း လိုရင် ထပ်ထည့်ကြော်ပေးပါ။

( ခေါက်ဆွဲက ပြုတ်လဲ မပြုတ်ထားတဲ့အတွက် ပထမတော့ အတော်မာနေပါမယ်။ အဲဒါကို အရွက်ကြော်တွေက ထွက်တဲ့ အချိုရည်တွေရယ်၊ ဝက်ရိုးပြုတ်ရည်က အချိုရေတွေနဲ့ စိုအိနေအောင် ကြော်ရမှာ ဖြစ်ပါတယ်။ ခေါက်ဆွဲထဲ စိမ့်ဝင်သွားအောင် ကြော်လိုက်တော့ ခေါက်ဆွဲက အိပြီး အချိုတွေ အကုန်ကို အထဲ ကို ရောက်ပါတယ် - အဲဒါက ရန်ကုန်ခေါက်ဆွဲကြော် စိုစိုအိအိလေး ဖြစ်နေရခြင်းရဲ့ လျှို့ဝှက်ချက်ပါ)

နောက်ဆုံး အရည်တွေအကုန် ကုန်ပြီ ဆိုရင်တော့ တရုတ်နံနံလေးထည့်ပြီး ကိုယ့်စိတ်ကြိုက် အပေါ့ အလေး အချို ထပ်ပြင်နိူင်ပါတယ်။

 ပုံမှာ ပြထားတဲ့အတိုင် ရန်ကုန်ခေါက်ဆွဲ စိုစိုအိအိ ချိုချိုလေးရပါပြီ‌။

ဝက်စတူး ( Braised pork belly)

ဝက်စတူးကို မြန်မာပြည်ပြန်ရင် ရွှေဘဲတို့လို စားသောက်ဆိုင်တွေမှာပဲ စားဖူးတာပါ။

ဒီမှာတော့ ဆိုင်တွေမှာ ရှာမရတော့ အိမ်မှာပဲ စမ်းချက်ရတယ်။

ဝက်စတူးကို နည်း၂မျိုးနဲ့ လုပ်နိူင်ပါတယ်။

steam လုပ်ပြီး ပေါင်းတဲ့နည်းနဲ့ slower cooker နဲ့ ပေါင်းတဲ့နည်းပါ။

steam လုပ်တဲ့နည်းက မုန်ညင်းချဉ် အခြောက်နဲ့ ပေါင်းတာဖြစ်ပြီး အဆင့်တွေများတယ်။

ခုလုပ်တဲ့နည်းကတော့ ထမင်းပေါင်းအိုးက slow cooker နဲ့ပဲ အလွယ်ပေါင်းလိုက်တာပါ။

ဝက်စတူးလုပ်ဖို့ လူ ၃ယောက်စာအတွက် လိုအပ်တဲ့ပစ္စည်းတွေက

 - ဝက်သား သုံးထပ်သား (pork belly) ၅၀၀ ဂရမ်

-  rock sugar (သို့) ရိုးရိုးသကြား စားပွဲဇွန်း ၃ ဇွန်းခန့်

- တရုတ်ဟင်းချက်ဝိုင်  စားပွဲဇွန်း ၃ဇွန်းခန့်

- ပဲငံပြာရည် အကြည်ရည် စားပွဲဇွန်း ၃ဇွန်းခန့်

- ပဲငံပြာရည် အနောက်ရည် စားပွဲဇွန်း ၁ဇွန်းခန့်

- နာနတ်ပွင့်  (star anise) ၃ ပွင့်ခန့်

- ဂျင်း ပါးပါး ၂လွှာခန့်

- Sichuan pepper  ၂၀ ခုခန့် (optional, မပါလဲရပါတယ်)

- ဆီ စားပွဲဇွန်း ၂ဇွန်းခန့်

- ဟင်းခတ်မှုန့် သုံးတတ်ရင် အနည်းငယ်

ပထမဆုံး ဝက်သုံးထပ်သား က အခေါက်တွေကို ဒါးနဲ့ခြစ် ရေးဆေးပြီး လက်မဝက်လောက် strip လေးတွေ လှီးထားပါ။

အိုးထဲကို မီးအနေတော်နဲ့တည် ပူလာရင် ဆီ ၂ဇွန်းထည့်၊ ဆီကျက်ရင် သကြား နှစ်ဇွန်းလောက်ထည့်ပြီး သကြားလေးတွေ နီညိုရောင်သန်းလာသည်အထိ ပျော်အောင်မွှေပေးပါ။

ပြီးရင် ဝက်သားတွေထည့် ရဲနေအောင် ကြော််လိုက်ပါ။

ဝက်သားအရည်ကုန်တဲ့ အထိ မွှေပေးနေပြီး၊ အရည်ကုန်တာနဲ့ သကြား၊ ပဲငံပြာရည် အကြည်၊ အနောက်၊ နာနတ်ပွင့်၊ ဂျင်း၊ Sichuan pepper အစရှိသည်တိို့ကို ထည့်မွှေပေးပါ။

(ဒီနေရာမှာ ကြက်ဥ ကြိုက်တတ်ရင် ကြက်ဥတွေပြုတ်အခွံနွှာပြီး ထည့်နိူင်ပါတယ်)

ဝက်သားအထက် ရေ မြုတ်အောင်ထည့်င်္ပြီး slower cooker နဲ့ ၆ နာရီလောက်ပေါင်းလိုက်တဲ့အခါ ...

လျှာပေါ် ပျော်ဝင်သွားမလောက် နူးညံ့ပြီး ၊ အနံ့ အရသာနဲ့ပြည့်စုံတဲ့ ဝက်စတူးရပါပြီ။

ဝက်စတူးက ဆီပြန်မဟုတ်ပဲ အရည် စပ်စပ်လေးနဲ့ပါ။

အပေါ်က ingredient amount တွေက ချက်တုံးကသေချာ မမှတ်ထားလို့ ခန့်မှန်းချေသာ ဖြစ်ပါတယ်။

လိုတိုးပိုလျှော့လေးတော့ လုပ်ပေးကြပါလို့။

အရွက်တွေကတော့ မုန်ညင်းရွက်၊ ကန်ဇွန်းရွက် အစရှိတာတွေကို  စောနက ဝက်စတူးက အရည်ထဲကို ထည့်ပြုတ်၊ ပန်းကန် အောက်ကခံပြီး ပွဲလှအောင် ပြင်ထားတာပါ။

(edited on 21/01/2019)